Siglir tar il cuntegn
Inhalt

helveCHia Iniziativa vul scumandar la chatscha

Cun l’iniziativa «Guardiaselvaschina enstagl chatschaders» vul la Partida svizra per ils animals scumandar la chatscha da revier en il chantun Turitg. Ils chatschaders sa dostan.

Chatschader mira cun perspectiv.
Legenda: Mo pli guardiaselvaschina duain astgar sajettar animals. Keystone

Ins stoppia proteger ils animal selvadis dals chatschadurs che giaudian lur hobi sin donn e cust dals pli flaivels, ils animals. Quai di Monika Heierli. Sco exempel numna ella la chatscha sin las vulps. Il chaun vegnia chatschà en la tauna da la vulp. En la lescha stettia dentant ch’ins na dastgia betg far mal ad in animal. Gist quai vegnia dentant fatg.

Natira duai regular

Chatschader cun sia preda en il guaud.
Legenda: En il chantun Turitg datti da quai da 1500 chatschaders. Keystone

Ensemen cun ses collegas da la Partida svizra per ils animals ha ella inoltrà l’iniziativa che pretenda che la chatscha da revier en il chantun Turitg vegnia scumandada. La tgira dals animals selvadis duajan surprender circa 100 guardiaselvaschina emploiads dal chantun. Quai tanschi, di Monika Heierli. Ils chatschaders na dovria lura betg. Els veglian che la natira reguleschia la populaziun dals animals selvadis, tras envierns fraids e dirs u la mancanza da nutriment. «En il chantun Turitg vegnan ils guauds duvrads uschè bler da la populaziun per sa recrear. E qua n’è la chatscha, uschia sco ch'ella vegn pratitgada oz, simplamain betg pli giustifitgada.»

Senza chatschaders datti problems

Quai vesa Samuel Ramseyer tut auter. El è in dals circa 1'500 chatschaders en il chantun Turitg e sesa en la suprastanza da l'uniun «Jagd Zürich». Gia il titel da l'iniziativa na constettia betg, di el. Era ils chatschaders sajan guardiaselvaschina. Ils chatschaders fetschian bler, per che la populaziun dals animals selvadis restia sauna. Scumandar la chatscha e simplamain surlaschar ils animals a sasezs e sperar che la natira regleschia lura schon tut. «I dess dapli donns tras ils animals. Ed era la populaziun fiss periclitada pervia da malsognas ed epidemias.»

Chatscha e raschun per problems

Chatschader sesa sin ses sez aut.
Legenda: Auter che en il Grischun datti a Turitg la chatscha da revier. Keystone

Sch'i dettia insanua problems sappian anc adina ils guardiaselvaschina intervegnir a moda professiunala, respunda Monika Heierli. Quai saja bler pli effectiv che la chatscha dad oz. Lezza chaschunia dapli problems che quai ch'ella schlia. U ch’ella haja extirpà ils animals u ch’ella haja procurà per ina surpopulaziun. La populaziun na craja betg pli quai che la lobi dals chatschaders raquintia. Ella saja perquai da buna speranza da pudair persvader la populaziun da scumandar la chatscha.

I dovra dapli infurmaziun

Betg bittar la fautsch el chanvà vulan ils chatschaders. Els sajan pronts da cumbatter per la chatscha, di Samuel Ramseyer. L’onn che vegn veglian els augmentar la lavur d’infurmaziun per che la populaziun da Turitg survegn in’idea realistica da la chatscha.

L’emprim tracta ussa il parlament chantunal da Turitg l'iniziativa ed en in, dus onns han las votantas ed ils votants il davos pled en chaussa.

RR actualitad 11:00