Siglir tar il cuntegn

Header

video
Ils chavals selvadis dal Tessin
Or da Actualitad dals 02.11.2017.
laschar ir. Durada: 1 minuta 7 Secundas.
cuntegn

helveCHia Ils chavals selvadis dal Tessin

Sin il Monte Generoso, nua ch'il Tessin cunfina cun l’Italia viva ina scossa da 23 chavals selvadis. L’istorgia dals chavals da Bisbino saja in'istorgia fitg trista ed il medem mument ina bellischma, di Ursula Garzoni da l'associaziun per ils chavals da Bisbino.

Igl è stà in dir enviern dal 2008/2009 – fraid e la naiv aveva cuvrì tut il Monte Bisbino, nua ch'il Tessin cunfina cun l'Italia. Sin quella muntogna vivevan quella giada duas scossas da chavals selvadis. Fin quel enviern na saveva però nagin dals chavals. Quels na chattavan pli nutriment ed èn perquai vegnids giu en las vischnancas ed han maglià las flurs da santeri e dals ierts, sa regorda Ursula Garzoni da l'associaziun per ils chavals da Bisbino.

audio
Mezdi: HelveCHia – chavals selvadis en il Tessin
ord Actualitad dals 02.11.2017.
laschar ir. Durada: 3 minutas 33 Secundas.
Ils chavals avevan uschè gronda fom ch'i han maglià las flurs dal santeri.
Autur: Ursula Garzoni Associazione Cavalli del Bisbino

Sur artitgels da gasetta è ina amia dad Ursula Garzoni vegnida a savair dals chavals. Ella, Luigia Carloni, ha sa messa a la tschertga dals chavals. E cura ch'ella ha vis els, tut maghers ch'i magliavan perfin lur agens excrements, ha ella gì ina missiun: gidar ils chavals.

Chavals surlaschads a sasez

Uschè ha Luisa Carloni retschertgà, danunder ch'ils chavals derivan. Ils chavals tutgavan ad in pur talian ch'era gia mort il 2003. Dapi là eran ils chavals surlaschads a sasez e vivevan en libertad.

Ils chavals selvadis dal Tessin...
Legenda: Ils chavals selvadis dal Tessin... Associazione Cavalli del Bisbino
Tschertins vulevan manar ils chavals tar il mazler!
Autur: Ursula Garzoni Associazione Cavalli del Bisbino

Perquai ch’ils chavals gievan adina sin ils prads dad auters purs, vulevan quels manar els tar il mazler. Il mazler na vegniva dentant betg en dumonda per Luisa Carloni. Perquai ha ella fundà l’associaziun per ils chavals. Oz tutgan ils chavals a l’associaziun ed els han chattà in nov dachasa sin il Monte Generoso, nua che la Svizra cunfina cun l’Italia. Dentant guardan voluntaris ch'ils chavals han era durant l’enviern avunda da magliar.

Per gronda part èn ils chavals da la vart taliana. Però adina puspè vegnan els sur il cunfin en il Tessin. Or da las duas scossas è però daventà ina scossa cun 23 haflingers. Ed era sch'ils chavals tutgan uss a l'associaziun, vivan els anc adina en libertad.

RR actualitad 12:00

Artitgels legids il pli savens