Che l'aua a Lavey-les-Bains è speziala è gia daditg enconuschent. Avant bunamain 200 onns han ins chattà là ina funtauna termala. Cun 62° celsius è ella la pli chauda da la Svizra. Ozendi vegn quella duvrada per il bogn termal che carmala mintga di plirs tschients persunas en la vischnanca al cunfin dal Vad cun il Vallais.
Ma bainbaud na duai l'aua chauda dal sutterran betg mo stgaudar il bogn termal, mabain era producir electricitad. A Lavey-les-Bains duai dar in indriz da geotermia da muntada naziunala. Che las lavurs preparativas èn uss a fin, e che la perfurada ha cumenzà, legra la cussegliera guvernativa dal chantun Vad Béatrice Métraux. Tenor ella in project istoric.
Quai è in di istoric, damai che quai è l’emprim project da geotermia che vegn realisà en il chantun Vad. Nus avain anc auters projects, autras ambiziuns – ma quai qua è concret.
Electricitad per 900 chasadas
Sche tut va sco planisà, duai la funtauna d'aua chauda, ch'ins crai da chattar en dus enfin trais kilometers profunditad, furnir electricitad per da quai da 900 chasadas en la regiun. Ma anc èsi memia baud da far festa. Auters projects, sco per exempel a Basilea il 2006 ni a Son Gagl il 2013, han stuì vegnir interruts, suenter che las perfuradas avevan procurà per terratrembels.
Nus na stuain betg stimular il grip per augmentar il dumber da sfendaglias. Quai è la gronda differenza tar il project a Basilea.
A Lavey-les-Bains sajan las ristgas dentant pli pitschnas, di Jean-François Pilet, il directur da la Alpine Geothermal Power Production AGEPP, l'interpresa che realisescha il project. «Nus furain en in grip che posseda gia ina massa sfendaglias. L'aua circulescha pia gia a moda natirala. E nus na stuain betg stimular il grip per augmentar il dumber da sfendaglias. Quai è la gronda differenza tar il project a Basilea.» Malgrà quai vegn il project surveglià dal Servetsch seismologic svizzer ch'ha installà ina rait da sensurs per pudair far la differenza tranter terratrembels natirals, e da quels che la perfurada chaschuna.
Dapli infurmaziuns:
Project da model per la Svizra
40 milliuns francs custa il project da geotermia, cumprais la centrala d'electricitad. 19 milliuns – e cun quai bunamain la mesadad – vegnan dal maun public. Ina finamira dal project saja numnadamain era da mussar che la geotermia haja potenzial en Svizra, di Philippe Durr, il president dal cussegl d'administraziun da l'AGEPP. «La finamira n’è betg da far daners per ils acziunaris, mabain da mussar che tals projects da geotermia èn avunda rentabels per ch'ina gronda part da la populaziun possia era profitar dad ella.»
La finamira è da mussar che tals projects da geotermia èn avunda rentabels per ch'ina gronda part da la populaziun possia era profitar dad ella.
Las lavurs duain esser a fin en il decurs da la segunda mesadad dal 2023, e cumpiglian era la construcziun da la centrala d'electricitad. Lura vegn era a sa mussar, sch'il project a Lavey-les-Bains dat nov schlantsch ad auters projects che duain vegnir realisads en Svizra ils proxims onns.