Siglir tar il cuntegn

Header

audio
HelveCHia: prender a fit giaglinas - in boom durant corona
Or da Actualitad dals 09.07.2020.
laschar ir. Durada: 3 minutas 19 Secundas.
cuntegn

Giaglinas per prender a fit Ovs a discreziun

Las atgnas giaglinas en curtin. En il temp da corona scuvran blers ils avantatgs da quels animals da chasa.

Il tegnair giaglinas giauda in veritabel boom durant il temp ch'il coronavirus ha sfurzà blers da restar a casa. Quai en tutta cas sch'ins dumonda l’Associaziun GalloSuisse. Els hajan anc naginas cifras exactas, mo il trend saja cleramain positivs. Uschia era tar la famiglia Pasquier che viva en in vitget datiers da Bulle el chantun Friburg. Dapi intginas emnas sgrasan e piclan sis giaglinas en lur curtin.

Solver tar la famiglia Pasquier

Il bab Grégoire prepara in per ovs en paintg per sias duas buobas pitschnas. Ovs da lur sis giaglinas che vivan en curtin, sco el accentuescha. Ed ovs han els avunda. Mintga di quatter enfin tschintg ovs frestgs, vul dir da quai da 30 ovs mintg’emna. E quels vali lura era da mangiar.

«Nus na mangiain betg tuts sez. Jau na sai betg sche quai fiss sanadaivel. Perquai regalain nus els era a noss parents ed a noss amis. Igl è in regal ch'è adina bainvis. Els dian en tutta cas ch'il mellen d’ov saja pli stgir e ch'il gust saja pli intensiv ch'ils ovs en stizun. »

Valur pedagogica

Las giaglinas, quai è in project da l'entira famiglia, di sia dunna Jenny.

«Grégoire ha gì giaglinas durant sia entira uffanza ed ha adina raquintà a nus. Quai ha fatg gust a noss dus uffants. Quai che ha plaschì a nus è l’idea ch’ils uffants s’occupan dals animals ed emprendan uschia dad ir enturn cun els. Ed era d’avair agens animals, noss agens ovs a chasa, quai era uschia l’idea.»

Giagliner
Legenda: En in tal giagliner passentan las giaglinas la stad en l'agen curtin. MAD

E la famiglia Pasquier n’è betg la suletta famiglia che ha scuvert l'amur per quels animals da chasa uschè pratics. Profità da quai boom ha era Florian Gobet. Tar sia interpresa «Locapoule» san interessads affittar in entir giagliner, cumplet cun giaglinas, nutriment e montascha en l'agen curtin. Custs per la stagiun d’avrigl enfin october, circa 800 francs.

Mintg’onn avain nus bleras dumondas. Quest’onn cun il corona e la glieud ch’era a chasa ed aveva bler temps avain vus gì ina dumonda anc pli gronda
Autur: Florian Gobet manader interpresa «Locapoule»

La dumonda è uschè gronda ch'els èn vendids or dapi intginas emnas. Els mainan schizunt ina glista da spetga. «Nossa clientella è fitg differenta. Nus avain tant famiglias cun uffants pitschens sco era pèrins pensiunads che vulan testar la chaussa avant ch’els investeschan propi lien.» Ed i dettia perfin hotels che veglian cun in giagliner en curtin porscher in'attracziun supplementara per lur osps. Sch'i dettia problems stettian els a disposiziun cun cussegl ed agid, di Gobet. Ma en general funcziuneschi quai bain. Uschè bain che prest la mesadad dals clients cumprian l'atun l’entir kit per cuntinuar cun las giaglinas.

Artitgels legids il pli savens