Siglir tar il cuntegn

Header

cuntegn

Festa federala da lutga 56'500 aspectaturs e set rintgs

A Zug han cumenzà las lavurs da construcziun da l'arena per la Festa federala da lutga e da gieus alpesters da quest avust.

Cuvert e plitost fraid èsi quella damaun cura ch’jau accumpogn Walter Lötscher sin l’areal da construcziun, là, agl ur da la citad da Zug, nua che l'arena da lutga cun ils siat rintgs vegn lura a star.

Ma anc na ves'ins betg la massa, quai conceda era il responsabel per l'infrastructura da la festa. «Il mument faschain nus ina via. Quai per ch’ils camiuns pon suenter charrar sin quella per transportar il material che nus duvrain per la construcziun da l’arena. Ed era per pli tard, durant la festa, per ch’ils osps possian ir sin ina surfatscha cun cuvrida dira.»

La pli gronda tribuna temporara dal mund

Avant circa duas emnas hajan els cumenzà a preparar il funs, di Lötscher e mussa sin ils mantuns da glera che laschan sminar la grondezza da l'arena cun sias sis tribunas. En prest trais emnas ston las lavurs sin il funs esser finidas. Lura cumenza numnadamain la construcziun da l'arena.

Cumparegliaziun dal maletgs

Stuschar reglader a sanester Stuschar reglader a dretg
Legenda:Avant e suenterL'areal da la Festa federala da lutga e da gieus alpesters vegn a curclar tut il funs a l'ur da la citad da Zug.Andreas Busslinger (esafzug) / MPS Europa

56’500 aspectaturas ed aspectaturs duain avair plazza en ella. In dumber immens, sch'ins patratga ch'il stadion da ballape dal St. Jakob a Basilea dumbra circa 38'000 plazzas, 1/3 pli pauc che la Zug Arena che vegn bajegiada per la festa da lutga. Per la construcziun filigrana ch’è auta sco ina chasa da sis auzadas vegn duvrà circa 3’000 tonnas material. Ina sfida logistica tut speziala, di l'anteriur lutgader ch’è stà en ils rintgs da duas festas federalas ed ha fatg in cranz a Sion il 1986. «En temps da fulla avain nus qua passa 250 persunas sin il plaz che lavuran. Da duvrar quels adina logisticamain en il dretg lieu è segiramain ina gronda sfida.»

Mussar Zug dad in'autra vart

Senza l'agid da l'armada e da la protecziun civila na fissia ina tala festa betg pussaivla, è il schef infrastructura da la Festa federala da lutga e gieus alpesters persvas. E senza il consentiment da la populaziun e cunzunt dals vischins era betg. «I dat segir era persunas che n’èn betg cuntentas che la festa vegn a Zug. Ma quai ch’jau hai udì e sentì è il plaschair grond. La maioritad ha plaschair che la festa ha lieu a Zug. Era perquai ch’ins po uschia mussar Zug dad in’autra vart.» Zug saja enconuschent sco plazza da finanzas, bancas, internaziunal ed uschia vinavant. Ussa veglian ins purtar insatge genuin a Zug e quai chatta el ina bun’idea ch’era la populaziun chattia salidaivel.

Mo avant ch'ils millis e millis fans da lutga pon far festa la fin d’emna dals 23 enfin ils 25 d’avust, sto schon anc vegnir suà in pau. L'arena è numnadamain mo ina part da l'infrastructura per la quala el è responsabel. Suenter vegnian las tendas. «Nus erigin per passa 10’000 persunas plazzas cuvertas en tendas. Ultra da quai datti in public-viewing sper la halla da hockey nua che persunas che n’han nagin bigliet pon observar la festa.»

Aura impurtanta

I dat pia anc bler da far. In factur impurtant è qua natiralmain era l'aura. Quella gidia schon tar las lavurs da construcziun, di Lötscher. «Quai ves’ins immediat sch’ins charrescha viadora en il funs lura dat quai lozza e buglia e quai dat puspè lavur supplementara.» Ma cun quai saja da quintar ed els hajan anc avunda dis da reserva. Uschia che tut duess lura esser pront per la gronda festa la fin d’avust. Pli impurtant saja che lezza fin d’emna saja sitga e bella. Quai fissi lura la pli bella pajaglia per tut ils involvids e tut las stentas e lavurs.

RR actualitad 11:00