Siglir tar il cuntegn

Header

cuntegn

helveCHia «Es u norru gschiids fahrzig!»: In bus senza manischunz

Dapi zercladur 2016 curseschan dus «SmartShuttles» tras Sion. Quels vehichels da l'auto da posta na dovran nagin manischunz. Tut automatic fan els lur tura tras la citad veglia. Fin 15 persunas chattan plaz en in «SmartShuttle».

audio
Mezdi: HelveCHia: SmartShuttle a Sion
ord Actualitad dals 30.11.2017.
laschar ir. Durada: 2 minutas 33 Secundas.

Ils autos da posta automatics èn cunzunt in magnet da turists. Cunquai che quels èn stads sin tut il mund en las gasettas, è la glieud vegnida da tut las varts natiers. «I saja schon in auter sentiment, sch'ins guardia la citad veglia ord in bus automatic. Interessant e plain tensiun», di Jeanine Berclaz dal post da turissem da Sion.

Co resta la posta sin via?

Avrir la box Serrar la box
Legenda: Auto da Posta

Sco eprim va in manischunz cun il «SmartShuffle». El manischescha il bus cun in controller. Il vehichel memorisescha la via. Uschia sa el, nua ch'el sto ir tras pli tard. Per evitar che l'auto da posta giaja encunter in mir ni ina persuna ha il vehichel intelligent ina pluna sensurs. Sche quels registreschan insatge, ferma el immediatamain.

Innovativs era en las muntognas

Per il cusseglier da citad Christophe Clivaz è il «SmartShuttle» in simbol per innovaziun. Cun quel vulan els numnadamain remplazzar ina part dal traffic public. Perquai saja la fasa da test era vegnida prolungada. Quella fiss atgnamain ida a fin l'october 2017. Ins vuleva però profitar vinavant ed uschia gidar a sviluppar ils autos da posta electrics.

Ins haja però era gì differentas sfidas cun il «SmartShuttle».

Uffants han mess sin l'emprova il vehichel

In problem èn surtut stads ils sensurs fitg sensibels. Pervia pitschens obstachels, sco per exempel flurs è il vehichel immediat sa fermà. Divers uffants han nizzegià ora quai ed han empruvà da fermar il «SmartShuttle» cun chaminar datiers dad el. L'auto da posta automatic na sa betg reagir sin differenzas sin ses traject. Sch'in auter auto è per exempel parcà en in lieu fauss, sa el bain fermar, dentant na sa el betg sviar.

Ina persuna resta adina en l'auto ed observescha il gir. Sch'i capita insatge u sche l'auto na funcziuna betg endretg, sa ella subit reagir.

RR actualitad 12:00

Artitgels legids il pli savens