La chatscha da patenta
En la gronda part da la Svizra, en 16 chantuns u mez-chantuns, vegn pratitgà la chatscha da patenta. Quai en ils chantuns da la Romandie, en il Tessin, il Grischun, la gronda part da la Svizra centrala ed ils mez-chantuns da l'Appenzell. Tar quai sistem da chatscha ston ils chatschaders far in examen e cumprar tar il chantun la patenta. Il chantun fixescha mintg'onn, quants animals che dastgan vegnir sajettads.
La chatscha da revier
Quest sistem da chatscha vala per ils chantuns dal nord-ost da la Svizra, en tut 9 chantuns davent dals mez-chantuns da Basilea enfin Son Gagl (guarda charta). Tar la chatscha da revier dattan las vischnancas politicas a fittanza il dretg da chatscha a gruppas da chatschaders. A la fin da la stagiun ston ils chatschaders annunziar al chantun, tge e quants animals ch'els han sajettà. Il dumber d'animals sajettads ha era in'influenza sin il tschains da fittanza.
Cas spezial Genevra - chatscha da reschia
En il chantun da Genevra è la chatscha vegnida abolida l'onn 1974 en ina votaziun dal pievel. Dapi lura reguleschan, sche necessari, guardiaselvaschinas la populaziun d'animals.
RR actualitad 12:00