Las duas leschas actualas dateschan da l'ultim tschientaner e na correspundan betg pli a las pretensiuns d'ozendi. Perquai duain ellas vegnir remplazzadas tras ina nova lescha. Quella duai, sper la dumonda dal possess da l'aua, er reglar la protecziun cunter auas grondas, il diever da las rivas sco er la protecziun da flums ed auals.
Perquai che la nova lescha è uschè dispitaivla, han las partidas sanestras la finala fatg in referendum autoritar, uschia ch'il pievel ha da votar davart la nova lescha l'entschatta favrer.
Tge din ils adversaris da la lescha?
Encunter la nova lescha èn cunzunt las partidas sanestras ed ils Verds. Els vesan principalmain il privel che firmas privatas u er concerns gronds pudessan avair en avegnir cun la nova lescha la pussanza ed uschia decider davart il provediment d'aua. Quel è tenor els in dretg uman che na duai betg esser en mauns privats.
Plinavant èn els er da l'avis ch'ils flums ed auals na vegnian betg protegids meglier cun la nova lescha. Ed er l'access liber a las rivas vesan els sco periclità.
Tge din ils aderents?
Quai èn la regenza, las partidas burgaisas ed ils cristiandemocrats. Els èn da l'avis che la nova lescha adatteschia las reglas al temp dad oz. Uschia saja ella la basa, per che flums ed auals stettian schubers e che la populaziun saja protegida d'auas grondas. En pli vegnian er reglads aspects ecologics en cas da renaturaziuns.
Tar il punct il pli dispitaivel, la dumonda tgi che duai posseder u avair il dretg da decider davart il provediment d'aua, èn els da l'avis che la nova lescha regleschia questa dumonda schizunt meglier che la veglia. Gia oz saja pussaivel che privats possedian provediments d'aua en la furma da societads cooperativas u societads acziunaras. La nova lescha garantiss tenor els ch'il davos pled en chaussa provediment d'aua restass tar las vischnancas. Uschia no possian ins betg discurrer d'ina privatisaziun.
RR actualitad 12:00