Igl è l’emprim cussegl consultativ per e da senioras e seniors sin livel chantunal ch'il Vad vul introducir. Dapi quest’emna possian interessadas ed interessads s’annunziar per il gremi, ha la ministra da sanadad dal Vad Rebecca Ruiz ditg envers Radio SRF.
En tut duajan quai esser var 20 persunas che sa radunan regularmain e discutan mesiras u projects per senioras e seniors dal chantun. In tal cussegl enconuschan singulas vischnancas ed era sin livel federal datti in tal. Dentant è quest l’emprim sin livel chantunal.
Tar il process per s’annunziar per il cussegl consultativ na saja betg impurtant, tge partida che la persuna ha. Mintgina e mintgin che abita en il chantun Vad po s'annunziar. Datti memia bleras annunzias decida ina lottaria. Dentant duain esser represchentads en il cussegl pli blers profils pussaivels: um, dunna, citad u pajais. Mintgin duai guardar tras ils agens egliers dal mintgadi sin la politica dal chantun Vad ed uschia duai quella vegnir meglierada.