Bittar las conservas, buttiglias, glischs da spargn u er las battarias vidas simplamain en in satg da plastic empè da zavrar tut minuzius e purtar quai lura en in center da rimnada per reciclar? Quest servetsch da reciclar porscha ina firma da Zofingen (AG) per radund 20 francs il mais per ils tegnairchasas privats en il chantun Argovia ed ils chantuns vischinants.
Il client na paja tenor l’interprendider David Gloor (21) dentant betg per il dismetter sco tal, mabain per il servetsch da «Multibag», manegia David Gloor envers il Schurnal regiunal da SRF:
Ins paja per che nus vegnin per ils satgs a chasa, per l’entira administraziun. Ed ils collavuraturs che zavran il rument ston gea era vegnir pajads
Critica da las vischnancas
Il servetsch da reciclar da la firma da Zofingen na plascha dentant betg a tuts. Uschia han 16 vischnancas en la part sut dal Fricktal scumandà a David Gloor da rimnar il rument da reciclar. L’interpresa n’haja tar nagina vischnanca dumandà per ina lubientscha, crititgescha Gisela Taufer da la cooperaziun da rument da la part sut dal Fricktal. Quai fissi dentant stà necessari, pertge la fin finala hajan las vischnancas il monopol da rument. Ellas èn quellas che decidan, tgi che dastga rimnar il rument e quai vala er per il rument reciclabel sco vaider, metal u palpiri.
Monopol è giustifitgà tenor chantun
Il monopol da las vischnancas garanteschia ch’il rument en las vischnancas vegnia era dismess, di David Schönbächler dal departament da l’ambient dal chantun Argovia.
E tar il rument tutga bain er il rument ch’ins po reciclar.
Che las vischnancas vulan salvar sezzas quest rument è chapibel. Las materias sco vaider, metal u palpiri han la finala era ina tscherta valita cun las qualas ellas pon far daners. Ch’il monopol da rument da las vischnancas vegnia a scader il proxim temp, na crai David Schönbächler betg, malgrà ch’i dat adina dapli interpresas che sa maschaidan en il commerzi cun il rument.
Dismetter il rument è in’incumbensa dal maun public – sco er il provediment da l’aua.
RR actualitad 12:00