Siglir tar il cuntegn

Header

cuntegn

helveCHia Countdown per peduns

La citad da Berna vul testar in’ampla che inditgescha als peduns quant ditg ch’igl è anc cotschen.

Hamburg ha ellas, Kopenhagen era - mo en Svizra na datti naginas. Amplas per peduns che mussan con ditg ch'igl è anc verd ni cotschen. La citad da Berna vul ussa far in emprim pass e testar ina da quellas amplas. Betg in zic tard? Na, manegia Karl Vogel, il planisader da traffic da la chapitala. «La tenuta generala è che quai na va betg en Svizra. Mo jau hai anc ina giada guardà exact ed hai vis che quai po en tscherts lieus senz’auter funcziunar ed jau sun ussa l’emprim ch’emprova quai.»

audio
HelveCHia: Tests d'amplas da peduns cun in countdown
ord Actualitad dals 10.10.2019.
laschar ir. Durada: 3 minutas 13 Secundas.

Era gia tema en Chasa federala

Discussiuns davart las amplas cun in countdown hai gia dà pliras giadas e quai perfin sin nivel naziunal. Avant quatter onns leva in postulat ella Chombra gronda dal parlament ch'il Cussegl federal examineschia da rudent tge consequenzas ch'i avess sch'ins introduciss era tar nus talas amplas.

Il Cussegl federal na leva dentant betg. Ins haja gia examinà quai e las amplas en Svizra funcziunian adina pli savens a moda intelligenta. Vul dir, tut tenor traffic adattescha il sistem da l'ampla il temps da las fasas cotschnas ni verdas. In sistem da countdown faschess quai anc pli cumplitgà e char. Quella posiziun è lura era il Cussegl naziunal suandà ed ha sepulì la proposta.

Custs da enfin 30'000 francs

Ed ussa vegn la citad da Berna e fa simplamain. Karl Vogel vesa quai main dramatic. Els na veglian betg far revoluziun. Els sco citad possian simplamain era testar questas chaussas. «Jau sun persvas che sche quai funcziunescha qua a Berna e chatta era in bun resun tar la populaziun, lura vegnin nus a far quai era anc en auters lieus.»

In emprim test vegni a dar a la staziun da Berna. Là tranter il bajetg principal cun las stizuns ed ils binaris ed ils perruns dals trams e bus. In passadi da peduns fitg frequentà e privlus. Il test cun l'ampla nova cumenza il december e custa tranter 20’000 e 30'000 francs.

RR Actualitad 12:10

Artitgels legids il pli savens