Siglir tar il cuntegn

Header

cuntegn

helveCHia Co vinavant suenter concurs dal casino?

Suenter il concurs dal casino da Campione d'Italia tschertga la vischnanca taliana ideas per il futur.

Cun il concurs dal casino da Campione d'Italia ha la vischnanca da circa 2000 abitants pers ses motor economic. Sper las plazzas da lavur mancan ussa era las entradas da taglia. Ch'il casino vegnia anc ina giada ad avrir sias portas, strusch insatgi che crai – er betg l'impressari tessinais Stefano Artioli. «La dumonda dal casino, e da quai sun jau adina pli fitg persvas, n’ha nagin futur. Vul dir che sch’ins avra puspè quai casino èsi da quintar che nus stuain baud ni tard puspè serrar el.»

audio
Mezdi: Nova vita per casino a Campione d'Italia
ord Actualitad dals 15.11.2018.
laschar ir. Durada: 3 minutas 47 Secundas.

Nagin futur per casino

Cun il concurs saja in'epoca ida a fin che na vegnia er betg pli a reviver. Per l'ina saja il casino, in bajetg monumental che porta la signatura da l’architect Mario Botta, bler memia grond e custia uschia ina massa. Per l'autra saja la concurrenza oz ina buna part pli gronda che avant diesch onns. Oz posseda Lugano in agen casino ed ils gieus per daners en l'internet giaudan adina pli gronda popularitad. Campione d'Italia dovria perquai ina nova perspectiva per il futur, di Artioli.

La gronda valur è il tresor e la segirtad da la Svizra.
Autur: Stefano Artioli. impressari tessinais

Art e residenzas per seniors

Ses plan è da nizzegiar il status spezial da l'enclava taliana, quai cun stgaffir in magazin liber da dazi, ina sort tresor per ovras d'art da tut il mund e da tut il gener. «Quai permettess era anc da crear ed organisar exposiziuns cun quellas ovras d’art. Mo la gronda valur è il tresor e la segirtad da la Svizra,» di Stefano Artioli.

Sco segunda pitga per il prosperar da la vischnanca vesa el la transfurmaziun dal casino en residenzas per seniors. Da quels appartaments profitassan era ils indigens, è Artioli persvas. «Nus integrain da quellas persunas che lavuravan avant el casino, uschia ch’ellas pon midar mastergn e lavurar en il sectur social e da la sanadad.» Tut en tut custass il project da quai da 100 milliuns francs.

Center sutterran duai carmalar osps

Era profitar dal status da dazi e da taglia spezial da Campione vul l'architect Fernando De Simone. El propona da construir in center da cumpra cun ustarias, centers da sport, salas da kino e da teater. E tut quai sutterran, lunsch viaden en il grip. «Uschia pudain nus augmentar il dumber dad osps dal di che passan, suenter ch’els han visità il center da cumpra il casino e vegnan uschia animads da dar in’egliada en lez e da visitar quel.» Ils custs per quest project muntassan a 120 milliuns francs.

Cun in center da cumpras cun ustarias e kinos pudain nus augmentar il dumber dad osps dal di.
Autur: Fernando De Simone architect

Passarella e port nov

Ina tut autra idea ha l'architect Diego Di Tomas. El vul modernisar il port da Campione. Ultra da quai vul el construir ina passarella che maina dal casino viadora el Lai da Lugano enfin tar il port. «Jau emprov da dar dapli plaz e procurar per dapli verd en il center istoric da Campione. La plazza avant il casino vegn concepida da nov uschia, ch’ins ha suenter ina tribuna natirala per las occurrenzas futuras.» Il project saja anc en ina fasa tempriva e perquai na possia el era betg dir con che la concepziun nova vegnia a custar.

Jau emprov da dar dapli plaz e procurar per dapli verd en il center istoric da Campione.
Autur: Diego Di Tomas architect

Dependent da la grazia da Roma

Ideas co i duai ir vinavant cun Campione d'Italia èn pia avant maun. Per tuts trais projects vala dentant; senza il consentiment da la regenza a Roma, na schabegia nagut. E lezza n’ha enfin ussa betg laschà sentir, ch'il destin da l'enclava taliana en Svizra haja gronda prioritad per ella.

RR actualitad 12:00

Artitgels legids il pli savens