Siglir tar il cuntegn

Header

audio
Dapli controllas da drogas, malgrà shutdown
Or da Actualitad dals 19.05.2022.
abspielen. Laufzeit 2 minutas 44 Sekunden.
cuntegn

Citad da Turitg Testà dapli drogas

Malgrà che clubs e locals da sortida èn stads serrads durant plirs mais, ha il Center da cussegliaziun per drogas da Turitg testà dapli substanzas l'onn passà ch’il 2019.

Radund 2'500 provas che consumentas e consuments han purtà sperasvi ha il center d’infurmaziun per drogas da la citad da Turitg analisà l'onn passà. Quai èn da quai da 200 provas dapli ch’avant la pandemia. Ch'i haja malgrà ch'ils clubs e locals da sortida èn stads serrads la fin finala dà dapli da far ch’anc il 2019 – è stada ina surpraisa per Dominique Schori ch'è manader d'equipa tar il center d’infurmaziun. Sia conclusiun: Bleras da questas substanzas na pon ins perquai betg declerar sco drogas da party.

Sche e quant fitg ch'il consum da talas drogas è creschì durant la pandemia na possia el bain betg dir. Mo per el saja cler ch'ins stoppia reveder l'avis che drogas sco ecstasy vegnian mo consumadas la fin d’emna en sortida.

Perquai discurrin nus era dapli da drogas dal temp liber, perquai che nus observain che las substanzas sumegliantas vegnan era consumadas tar partys, tar amias ed amis a chasa u en ina WG.
Autur: Dominique Schori Saferparty.ch

Quitads fa ad els che las tablettas dad ecstasy u MDMA, sco la substanza vegn era numnada, èn ils davos onns vegnidas adina pli potentas e cuntegnan dapli substanza activa. 9 da 10 tablettas analisadas en il labor dal center d’infurmaziun cuntegnevan dapli che la dosa maximala cussegliada. Quai augmentia il ristg dad ina surdosa, cunzunt sche differentas drogas vegnan consumadas ensemen.

Testar per dapli segirtad

Dapi passa 20 onns pon persunas che consumeschan drogas laschar analisar quellas a Turitg, sajan quai direct a las partys en il labor mobil da Saferparty.ch u en las localitads dal Center d’infurmaziun per drogas betg lunsch davent da la staziun da tren principala. E dapi l'entschatta datti era critica. Enstagl da cumbatter il consum illegal da drogas, promovia la citad uschia il consum. Quai è in punct ch'è adina puspè d'udir. Ina critica che Dominique Schori na lascha betg valair. Tgi che vegni tar els e laschia analisar sias drogas, haja gia cumprà quellas.

Quai che resta anc per nus è da guardar il consum. Sche quellas persunas sa decidan da consumar drogas, duain ellas ristgar uschè pauc sco pussaivel.
Autur: Dominique Schori Saferparty.ch

Testar substanzas ed il medem mument infurmar davart l’effect ed ils privels da quellas ed era cussegliar persunas che tschertgan agid, quai saja lur finamira, di Dominique Schori.

RTR actualitad 12:00

Artitgels legids il pli savens

Scrollar a sanestra Scrollar a dretga