Far in viadi en in mund misterius, observar peschs ed auters animals da flums e lais e simplamain giudair in bel temp. Quai empermetta l’aquari Aquatis a Losanna a ses visitaders. Ma gist quels èn in problem.
Gia durant l'emprim onn suenter l’avertura n’han ins betg pudì carmalar il dumber dad osps giavischà. Enstagl da 450’000 èn vegnids mo da quai da 380’000. Ed era quest onn na vegnan las finamiras pli modestas betg cuntanschidas, sco quai ch’il radio e la televisiun da la Svizra franzosa RTS rapportan.
En il meglier cas quintan ils possessurs da l’aquari cun 240’000 visitaders. Quai smatga natiralmain sin las finanzas, conferma Bernard Russi, in dals schefs d’Aquatis. Ils ultims dus onns hajan els gì sut il stritg entradas da bun 200’000 francs. Quai na tanschia natiralmain betg per pudair far amortisaziuns.
Igl è cler che nus avain empruvà d’optimar la gestiun, da reducir il consum d’electricitad e d’aua. Nus avain pudì far respargns era tar il persunal, la circulaziun e tar il schubregiar.
Cun quellas mesiras ed ulteriuras optimaziuns spera Russi da pudair augmentar las entradas e da render profitabel l’aquari. Ch’i dovri ses temp haja el adina savì, ha el ditg ad RTS:
Nus avain ina finamira da tschintg onns. En tschintg onns vegn quell’interpresa a far gudogn. Oz n’è ella anc betg profitabla, quai è tut normal.
Dumandà per agid tar la citad da Losanna
Ma para ch’ils possessurs vulan vegnir uschè spert sco pussaivel sin ina frastga verda. Sco quai che la gasetta «24 heures» scriva quels dis, hajan ils possessurs fatg la dumonda a la citad da Losanna da survegnir enavos ina part da la taxa da divertiment che vegn incassada cun mintga bigliet. Tut tenor categoria munta quella a trais enfin quatter francs per bigliet. Cun quai giavisch saja el dentant fruntà sin pauca chapientscha tar las autoritad da la citad, deplorescha Bernard Russi.
La resposta negativa conferma Grégoire Junod, il president da la citad da Losanna. Ils possessurs d’Aquatis hajan dapi il cumenzament savì, ch’els hajan da pajar quella taglia. Ultra da quai haja l’administraziun gnanc las cumpetenzas da dispensar insatgi da quella. Pussaivel fissi dentant da sustegnair tschertas exposiziuns spezialas e temporaras da l’aquari cun ina contribuziun ord la cassa da la citad. Tenor Junod duvrassi per quai ina dumonda uffiziala da l’aquari ed in concept per ina strategia economica per ils proxims onns.
Novas exposiziuns e dapli reclama
In tal pass na vul Bernard Russi anc betg prender en mira. L’emprim veglian els ussa ina giada augmentar la reclama per Aquatis e lantschar ina seria d’exposiziuns spezialas per carmalar dapli visitaders en lur aquari. Russi crai che quai possia dar nov schlantsch e procurar per ina basa finanziala sauna.
RR actualitad 11:00