Siglir tar il cuntegn

Header

cuntegn

helveCHia 9 milliuns per in nov indriz d'emplenir buttiglias ad Elm

L'aua minerala u er l'Elmer Citro èn sper la skiunza Vreni Schneider probabel ils pli enconuschents exports dal vitg Elm en il chantun da Glaruna. Cun l'investiziun en in nov indrizs d'emplenir buttiglias ha la possessura Ramseier SA uss dà in cler segn per la producziun ad Elm.

Tenor il schef da la Ramseier SA, Christian Consoni, èn las investiziuns stadas necessarias per pudair spargnar energia e pudair producir effizientamain. Quai è dentant er ì in tant lunsch sin donn e cust dal persunal. Otg da las 26 plazzas da lavur èn vegnidas stritgadas. Da quai èn sis persunas idas en pensiun, duas han pers la plazza.

audio
Mezdi: Ramseier investescha en aua minerala
ord Actualitad dals 15.06.2017.
laschar ir. Durada: 2 minutas 35 Secundas.

Cler segn per las marcas Elmer

Tuttina èn ils nov milliuns francs tenor Christian Consoni in cler mussament en favur da las marcas Elmer Citro ed Elmer Mineral. Cun quai veglian els metter paisa sin l'uschenumnada 'swissness'. Els mantegnian plazzas da lavur en Svizra e produceschian cun products primars svizzers. Questa filosofia persequitescha Ramseier er al lieu da producziun Lucerna. Là ha la Ramseier SA investì 27 milliuns francs.

Tenor mes avis han questas investiziuns ina gronda muntada perquai ch'ellas vegnan fatgas en ina regiun periferica. Da là anora vesain nus che l'aua minerala natirala ha ina immensa impurtanza or en las regiuns...
Autur: Martin Candinas president da la cuminanza d'interess aua minerala

Investiziuns malgrà martgà dir

L'onn passà ha la Ramseier SA nudà 5% damain svieuta. Gudogn u sperdita na communitgescha l'interpresa betg. Pervi dal ferm franc èn ils imports d'aua minerala creschids e la producziun indigena ida enavos. Tuttina è Christian Consoni persvadì dal potenzial en Svizra. Quai demussan las investiziuns a Lucerna ed ad Elm.

... Il squitsch è fitg grond e qua datti mo ina pussaivladad, investir ed automatisar. Quai vegn era fatg qua ...
Autur: Martin Candinas president da la cuminanza d'interess aua minerala

Las marcas Elmer èn cunzunt conuschentas regiunalmain ed en la Svizra tudestga. Tar l'aua minerala ha Elmer 1 fin 2% part dal martgà Svizzer. Tar las auas dultschas cun citrona èn els tranter 15 e 20%.

RR actualitad 12:00

Artitgels legids il pli savens