Siglir tar il cuntegn
cuntegn

Svizra Hej Edy Toscano – la firma svizra vegn en mauns svedais

A partir da l’emprim da schaner 2017 surpiglia la gruppa svedaisa AF la firma svizra d’inschigner e da planisaziun Edy Toscano. L’Edy Toscano ha en Svizra 20 sedias decentralas, sis da quellas èn en Grischun.

La communicaziun da medias.
Legenda: La Edy Toscano SA ha num a partir dal 2017 AF-Toscano. RTR / Isabelle Jaeger

Cun questa transacziun veglia la gruppa AF avanzar en Svizra en ils top 3 da la branscha - e realisar ina svieuta annuala da passa 100 milliuns francs. Quai scriva ella en sia communicaziun da medias.

Ils 60 acziunaris da la Edy Toscano SA - ord la famiglia fundatura e dal ravugl dals collavuraturs - hajan acceptà in'offerta da la AF, scriva la Edy Toscano. Davart dal pretsch èn las duas interpresas sa cunvegnì da taschair.

Sedias e collavuraturs da la Edy Toscano SA vegnian surpigliads

La Edy Toscano SA vegn ad avair num a partir dal 2017 AF-Toscano. Che l’interpresa haja midà maun n’haja nagin’influenza sin la gestiun operativa da l’interpresa. Erich Montalta resta parsura da la suprastanza e maina-gestiun. Tenor la communicaziun vegnian surpigliads las 20 sedias en Svizra, las trais en Germania e tut ils 370 collavuraturs.

L’onn 2015 ha l’Edy Toscano fatg ina svieuta da var 50 milliuns francs. La sedia principala è a Turitg. Las sedias grischunas èn a Cuira, Mesocco, Puntraschigna, Poschiavo, San Murezzan e Zuoz.

La cumpradra - la gruppa svedaisa AF

La Gruppa AF è domiciliada a Stockholm (S) ed è in’interpresa da cussegliaziun d’inschigners en la branscha dad energia, industria ed infrastructura. La AF haja 8’500 collavuraturs sin tut il mund. Cun la AF-Consult Switzerland SA a Baden è la AF gia preschenta dapi il 2007 en Svizra.

RR novitads 11:00