Sia vita giaja oz vinavant exact tuttina co quai ch'ella haja cumenzà ier, uschia Heinz Grand vers il schurnal regiunal da radio SRF. Simplamain scalinia ses telefonin uss d’in cuntin.
Ponderar fitg bain e lura decider
Schebain i dettia or dal cusseglier naziunal Brand in cusseglier federal Brand na tradescha el betg. Quella decisiun na saja anc betg crudada. El vegni a prender las duas emnas che restian per ponderar fitg bain e lura decider. Ina decisiun ch'el vegnia a prender ensemen cun sia dunna, cunquai che massa vegnissia a sa midar per el e sia dunna, per lur lavur e lur domicil futur.
I regia cuntentientscha entaifer la partida
Che Heinz Brand prendia e nizzegia tut il temp per sa decider, è era Andrea Davaz, il vicepresident da la PPS grischuna persvadì. Brand saja in che planiseschia minuzius.
Il mument regia cuntentientscha entaifer la partida pervia da la demissiun da la ministra da finanzas: pertge uschia saja per l’ina la via libra per la concordanza en il Cussegl federal e per l’autra na fetschia nagina partida pli opposiziun encunter in segund sez da la PPS en il Cussegl federal.
Schanzas èn plitost pitschnas
Dentant dad ina via libra per Heinz Brand sco cusseglier federal na vul Andrea Davaz betg discurrer.
Las schanzas sajan bain intactas, dentant era plitost pitschnas, cunquai ch'ina massa facturs gioghian ina rolla. En spezial vegnian era las pretensius da la Svizra latina sin in Cusseglier federal ad esser relevantas, tgi che la fracziun da la PPS Svizra vegnia a preschentar ils 9 da december a l'assamblea federala per l'elecziun.
