La directura RTR Ladina Heimgartner spera da pudair spargnar il milliun senza memia grond effect sin il program. Era sche quai na saja betg garantì.
Nus dain tut, per ch'il public na senta nagut da las mesiras da spargn. Ch'i dat era en l'avegnir il program or da tut las regiuns, en tutta diversitad, cun focus sin infurmaziun regiunala e cultura.
Perquai prevesa RTR mesiras da spargn surtut tar ils meds da producziun che duain daventar pli agils, innovativs e bunmartgads, tar la communicaziun cun main inserats e dapli contact cun il public e cun remplazzar investiziuns cun dapli servetschs cumprads da terzs. Pli segira è Heimgartner da pudair spargnar senza relaschadas. Ella quinta da reducir 1-2 plazzas cun la fluctuaziun natirala.
Spargnar 100 milliuns e stritgar 250 plazzas
Ils respargns vegnan repartids sin las unitads d'interpresa da la SSR SRG:
Tuts han da spargnar
| SRF | 20 milliuns |
| RTS | 15 milliuns |
| Direcziun generala | 15 milliuns |
| RSI | 10 milliuns |
| RTR | 1 milliun |
| SWI | 1 milliuns |
| Infrastructura e distribuziun | 40 milliuns |
Il program da refurma cumpiglia respargns da 100 milliuns francs tar l'entira SSR SRG ed ina reducziun da 250 plazzas. Questa reducziun da plazzas da lavur vul ins realisar – tant sco pussaivel – sur la fluctuaziun natirala. Relaschadas na sajan però betg exclusas, scriva la SSR.
Cooperaziuns, partenadis e nova plattafurma communabla
La nova strategia cumpiglia tenor communicaziun ulteriuras mesiras. Tranter autras da tgirar dapli cooperaziuns e partenadis – surtut cun medias privatas, per exempel cun barattar material. Però era cun crear ina plattafurma digitala cun ils cuntegns da la SSR SRG cun suttitels e sincronisaziuns per il diever sur ils cunfins linguistics ora.
Da l'autra vart è la SSR SRG sa retratga da la firma da commerzialisaziun Admeira. Quai cun vender sia part da las aczias (33,3%).
RR novitads 11:00
