Urs sirics èn proxims parents da l'urs brin, che nus enconuschain en Europa. Sco quai ch'il num tradescha, vegnan els oriundamain dal proxim orient. Tipic per l'urs siric è sia colur. Pli vegls ch'els vegnan, e pli alvs ch'il pail vegn. Quai è sumegliant sco tar ils umans. Plinavant èn els pli pitschens ch'ils urs che nus enconuschain.
Il 1983 è Fränzi naschida a Berna, in onn pli tard ès ella vegnida en il parc d'animals a Goldau en il chantun Sviz. Dapi lura viva ella en il parc zoologic. L'ursa sirica da 35 onns ha era divers descendents. L'ultima giada ch'ella ha survegnì pitschens, aveva ella però 12 onns. Dus da ses giuvens vivan anc adina en il parc dad animals a Goldau.
Razza fitg periclitada
En la Siria na datti bunamain nagins urs pli ed era en ils pajais enturn vivan be anc singuls urs sirics. Divers animals vivan en curtins zoologics ubain en parcs da natira en l'Europa. L'allevament da novs animals è fitg difficil: Cunquai ch'i dettia be pli paucs urs sirics, dettia er mo pli singuls animals che sajan abels da sa paregliar, declera il veterinari dal parc zoologic da Goldau, Martin Wehrle.
RR actualitad 17:00