Hansjörg Hassler: vicepresident dal Fond Svizzer per la Cuntrada

Il Cussegl federal ha elegì Hassler sco nov commember da quest organ directiv e, a medem temp, sco vicepresident.

Hansjörg Hassler, il pur da muntogna ed anteriur cusseglier naziunal grischun.

Legenda da maletgs: Hansjörg Hassler, il pur da muntogna ed anteriur cusseglier naziunal grischun. Keystone

Il Fond Svizzer per la Cuntrada (FSC) ha er ina nova presidenta. La turitgaisa Verena Diener daventa successura da Marc F. Suter che sa retira la fin da l'onn pervi da la limitaziun dal temp d'uffizi da 13 onns. Verena Diener è anteriura cussegliera naziunala, cussegliera dals chantuns e cussegliera guvernativa dal chantun Turitg.

Fundà avant 25 onns

A chaschun da la festa da giubileum da 700 onns Confederaziun ha il parlament svizzer fundà l'onn 1991 il Fond Svizzer per la Cuntrada FSC cun l'intent da sustegnair premuras concretas per mantegnair, revalitar e restaurar cuntradas cultivadas en accord cun la natira.

Sco instrument da promoziun da la Confederaziun independent da l'administraziun ha il FSC pudì sustegnair fin ussa passa 2'400 projects locals e regiunals en tut las cuntradas dal pajais cun var 142 milliuns francs. Davart la concessiun da contribuziuns decida la cumissiun dal FSC ch'il Cussegl federal elegia e che sa cumpona da spezialists da differentas disciplinas.

RR novitads 11:00