Hackers han empruvà il schaner da spiunar ora il manaschi d'armament Ruag ed il Departament federal da defensiun VBS. Il cusseglier federal Guy Parmelin ha confermà infurmaziuns da las gasettas «Tages-Anzeiger» e «Der Bund». I na saja anc betg cler, tge donns ch'ils hackers hajan chaschunà.
Las attatgas hajan da far cun la spiunascha d'industria, ha ditg Parmelin a las gasettas. Lezzas han era rapportà che la Russia stettia davos las attatgas. Tenor il minister da defensiun hajan las attatgas gì lieu durant il Forum mundial d'economia. Els hajan pudì intervegnir e funcziunar vinavant. La procura publica haja avert ina procedura pervi da l'attatga.
