Ils 5 da mars è la chaschun da laschar tutgar ils zains e da sa fermar per ina minuta da silenzi.
Mintgina e mintgin en quest pajais enconuschia ina persuna che saja stada malsauna u che haja pers confamigliars. La minuta da silenzi na propona Parmelin dentant betg be per las entant passa 9'000 unfrendas dal virus e lur confamigliars. Ins duai er pensar vid las persunas che cumbattian per il mument la malsogna u sias consequenzas tardivas e quels che gidan e sustegnan els da far quai.
Tuts ensemen, pass per pass, vegnin nus a dumagnar la pandemia.
Il Cussegl federal vul dentant desister d'ina ceremonia per commemorar las unfrendas. Quai hajan ins decidì communablamain cun ils presidents dal Cussegl naziunal e dal Cussegl dals chantuns. I na saja betg il dretg mument, ha el declerà a l'emettur RTS. La situaziun epidemiologica na lubeschia betg quai.
Ord l'archiv:
Avant stgars in onn è vegnì fatg applaus per quels che lavuran en il sistem da sanadad, sco engraziament per lur lavur. L'october da l'onn passà han els dentant er fatg cler che be applaus, na tanscha betg.
