Siglir tar il cuntegn

Header

video
Status spezial per fugitivs ord l’Ucraina
Or da Telesguard dals 04.03.2022.
laschar ir. Durada: 1 minuta 23 Secundas.
cuntegn

Guerra en l'Ucraina Svizra sa prepara sin grond dumber da fugitivs

Il Cussegl federal vul activar il status da protecziun S per Ucranaisas ed Ucranais che ston bandunar lur patria pervia da la guerra. Tras quest status survegnan ils fugitivs spert il dretg da dimora en Svizra, senza ch'els ston ir tras la procedura d'asil normala.

  • Il Cussegl federal vul activar il status da protecziun S per Ucranaisas ed Ucranais.
  • La Svizra surpiglia en pli ulteriuras sancziuns envers la Russia. Las novas mesiras tutgan cunzunt il sectur da finanzas.
  • Plinavant vegnan il UVEK ed il WBF incumbensads da segirar il provediment cun gas per l'enviern che vegn.

La Svizra sa prepara sin in grond dumber da fugitivs ord l'Ucraina. Tenor la ministra da giustia Karin Keller-Sutter èn la Confederaziun ed ils chantuns intensiv vidlonder da preparar la planisaziun d'urgenza. Il Cussegl federal vul dentant era far pussaivel, che persunas a la tschertga d'ina protecziun temporara pon survegnir suttetg tar privats. Quai a ditg Karin Keller-Sutter en in'intervista cun la «NZZ da la dumengia».

Ils pajais da l'Europa da l'Ost desistan il mument dentant – da reparter ils fugitivs ucranais en l'Europa, sco la cussegliera federala a ditg.

Cussegl federal propona status S

Il Cussegl federal vul activar il status da protecziun S per Ucranaisas ed Ucranais che ston bandunar lur patria pervia da la guerra. Tras quest status survegnan ils fugitivs spert il dretg da dimora en Svizra, senza ch'els ston ir tras la procedura d'asil normala.

Tras il status S surpiglia la Svizra ina schliaziun ch'ils blers commembers da l'Uniun Europeica han decis. Il Cussegl federal vegn uss a consultar fin mez da l'emna proxima ils chantuns e las organisaziuns associadas, avant ch'el prenda ina decisiun definitiva.

audio
Status da protecziun per fugitivs da l’Ucraina
ord Actualitad dals 04.03.2022.
laschar ir. Durada: 3 minutas 1 Secunda.

En consequenza a l'attatga russa sin l'Ucraina han gia passa in milliun persunas bandunà l'Ucraina. Tut tenor svilup vegn quest dumber anc a crescher. Il Cussegl federal quinta ch'Ucranaisas ed Ucranais vegnan er a tschertgar protecziun en Svizra. Els pon er senza visum vegnir per 90 dis en Svizra – tras il status S duai dentant vegnir stgaffì ina schliaziun, er suenter che quels 90 dis èn passads.

Status S

Avrir la box Serrar la box

Il status S exista gia en la lescha d'asil. A persunas cun basegn da protecziun po la Svizra porscher cun il status S protecziun durant in temp da privel – cunzunt durant il temp da guerra. Quest instrument è vegnì stgaffì en consequenza a las experientschas ord la guerra en Jugoslavia. Cun il status da protecziun survegnan fugitivs ord l'Ucraina in pass S. Il dretg da dimora cun il pass vala in onn – po dentant vegnir prolungà.

Chantuns vegnan indemnisads

Uschè svelt ch'il status S è en funcziun, èn ils chantuns responsabels per dar alloschi als fugitivs. Els survegnan in'indemnisaziun pauschala da la Confederaziun per dar alloschi, per pajar la cassa da malsauns e la tgira dals fugitivs. Quels pon era abitar tar persunas privatas.

Decisiuns da l'Uniun Europeica

L'Uniun Europeica aveva gia decis ils 3 da mars ina protecziun transitorica per fugitivs ord l'Ucraina. Per quest intent avevan ils ministers da l'intern e giustia da l'UE decis d'activar la directiva TPD (Temporary Protection Directive). Quella vala per tut ils commembers da l'Uniun Europeica, per la Svizra n'è quella però betg applitgabla. Il status S è però fitg sumegliant.

Ulteriuras mesiras cunter la Russia

La Svizra introducescha ulteriuras mesiras cunter la Russia. Quellas pertutgan cunzunt ils secturs da finanzas e da products da diever dubel. Uschia realisescha la Svizra uss tut las sancziuns che l'Uniun Europeica aveva decidì ils davos dis dal favrer. Vitiers ha il Cussegl federal decidì da bloccar las facultads d'ulteriuras persunas cun relaziuns stretgas cun il president russ Wladimir Putin. La Svizra realiseschia las sancziuns en accord cun la neutralitad, scriva il Cussegl federal. Era per activitads umanitaras sajan excepziuns pussaivlas.

video
Parmelin: «Tuttas sancziuns da l'Uniun Europeica èn surpigliadas ed implementadas»
Or da News-Clip dals 04.03.2022.
laschar ir. Durada: 33 Secundas.

Segirar il provediment da gas

En vista a la guerra en l'Ucraina vul Cussegl federal segirar il provediment cun gas per l'enviern che vegn. Quest enviern saja il provediment d'energia da la Svizra segirà, tenor las infurmaziuns actualas, ha scrit il Cussegl federal. Segs da dumonda dettia areguard l'enviern 2022/2023. Perquai ha il Cussegl federal incumbensà uffizis federals da segirar che la branscha da gas svizra possia spert e cuminaivlamain cumprar gas, capacitads per accumular gas, gas liquid e capacitads per retrair gas liquid.

video
Sommaruga: «La guerra ha er in'influenza per il provediment d'eneriga»
Or da News-Clip dals 04.03.2022.
laschar ir. Durada: 50 Secundas.

RTR novitads 15:00

Artitgels legids il pli savens