La Svizra stoppia quintar ch’i dettia era il proxim temp mintga mais fin a 10’000 persunas che tschertgian protecziun en Svizra. Ina fin da la guerra na saja numnadamain betg da spetgar uschè spert, ha la scheffa dal Departament federal da giustia e polizia ditg tar ina conferenza da medias.
Dasper la tschertga d’alloschis saja in tema d’impedir che persunas maldovrian il status da protecziun S. Per exempel sch’ina persuna fugida returnia en l’Ucraina u sche quella haja gia survegnì protecziun en in auter pajais. Fin la fin da l’onn duai in gremi elavurar in rapport. Plinavant vegnia il mument sviluppada ina plattafurma europeica da registraziun cun participaziun svizra. Quella duai impedir maldiever.
Expensas da 1,2 milliardas francs
Ils custs per retschaiver las persunas fugidas da l’Ucraina muntan il mument a 1,2 milliardas francs, tenor la ministra da giustia Karin Keller-Sutter. Las expensas na fetschian betg part dal preventiv mabain d’in post extraordinari.
Ils custs sa refereschian sin las radund 50’000 persunas che la Svizra haja retschavì fin uss, e cuntegnian ils daners che la Confederaziun paja als chantuns. I sa tractia d’ina stimaziun, ha ditg la cussegliera federala.
