Siglir tar il cuntegn

Header

cuntegn

Guerra en l'Ucraina Chantuns fan quitads pervi dals gronds custs per fugitivs

Ils chantuns fan quitads pervi dals gronds custs per ils fugitivs da l’Ucraina. Per alloschament, custs da viver e cassas da malsauns quintan els cun custs da 1,25 fin 2,25 milliardas francs per l’onn current. L’auter onn pudessan quests custs s’augmentar sin 7,5 milliardas francs. Quai scriva la «NZZ am Sonntag».

Credit supplementar

Actualmain surpiglia anc la Confederaziun la gronda part dals custs. Il Secretariat da stadi per la migraziun na veglia anc betg commentar questas calculaziuns. Pervi dals custs enorms saja realistic ch’il secretariat da stadi pudess dumandar in credit supplementar – haja ditg in pledader envers la gasetta da la dumengia.

Per il stab spezial d'asil saja quella calculaziun realistic. La Confederaziun n'ha anc betg fatg agens quints. I vegn dentant partì dal fatg ch'in fugitiv custa circa 20'000 francs per onn. Questa summa sa cumpona da la pauschala globala da 1'500 francs che la confederaziun paja mintga mais als chantuns per mintga fugitiva e per mintga fugitiv.

Agid privat pudess era esser in risico

Actualmain sajan radund la mesadad dals fugitvs en alloschis privat. Ins na saja dentant betg quant ditg ch'els vegnan a star là. Sche els van ord da quels alloschis privats, ston ils chantuns porscher ad els ina alternativa.

Blers experts partan dal fatg ch'ils fugitivs na vegnan betg a turnar uschè spert enavos en l'Ucraina. Quai ha era Gaby Szöllösy ditg avant las medias.

RTR novitads 09:00

Artitgels legids il pli savens