Siglir tar il cuntegn

Svizra Grondas investiziuns en la rait da viafier

Las viafiers svizras han memia ditg investì memia pauc en lur infrastructuras. Ussa vegn quai char. Per ils proxims quatter onns duai la Confederaziun metter a disposiziun passa 13 milliardas francs per mantegnair la rait da viafier.

Trais persunas vid lavurar vid las rodaglias da tren.
Legenda: Ils proxims onns spetga blera lavur vid las rodaglias. Keystone

Sur blers onns è vegnì dà dapli paisa sin engrondir la rait ch’el mantegniment da la rait existenta. I vegnia uschia anc a cuzzar insaquants onns fin ch’ins saja puspè suenter en il mantegniment sco quai ch’i ha num en ina communicaziun da las VFF, la Viafier retica e la Federaziun dal traffic public.

La segirezza sin la rait da viafier svizra saja bain garantida, i saja però necessari d'investir a moda preventiva. Concret stoppian ins per exempel emplenir ils letgs tranter las rodaglias u glimar las rodaglias.

Pussibel saja quai dentant sulet cun dapli daners. Cun la cunvegna da prestaziun 2017 fin 2020 vul la Confederaziun dar ora 13,2 milliardas per il manaschi ed il mantegniment da la rait da viafier. Quai en 15% dapli che fin ussa.

Bleras investiziuns er tar la Viafier retica

Era la Viafier retica sto prender suenter investiziuns en punts, tunnels, galarias e rodaglias. Gia ils davos onns hajan ins investì dapli, munta 13 milliuns ad onn enstagl dad 8 mo per las punts. Enfin l’onn 2025 quinta la Viafier retica dad esser suenter cun las investiziuns tarl las punts ha Christian Florin confermà ad RTR.

Christian Florin è manader infrastructura da la Viafier Retica.
Legenda: Christian Florin, manader infrastructura Viafier Retica. G.-M. Maissen
Nus na vain per cletg betg gì ina fasa pli lunga senza investiziuns da mantegniment. Quai è matai in avantatg da betg esser uschè grond sco la Viafier Federala.
Autur: Christian Florinmanader infrastructura Viafier Retica

Viafier Retica sin buna via

Las Viafiers federalas svizra han durant ils onns 1997-2010 investì pauc en il mantegniment. Quai saja retrospectiv stà in sbagl, uschè Philippe Gauderon, manader d’infrastructura da la VFF. Ussa stoppian las Viafiers federalas prender suenter la lavur manchentada. Actualmain è quai lavur cun custs totals da 2,8 milliardas francs.

Meglier è la situaziun tar la Viafier Retica. Là han ins constant adina puspè pudì realisar projects pitschens e gronds. Uschè han ins per exempel investì ils davos 13 onns bun 70 milliuns en punts. Ulteriurs 130 milliuns vegnan ins anc a stuair investir, uschia il manader d’infrastructura da la Viafier retica Christian Florin. Vitiers vegnan anc projects da mantegniment sco per exempel galarias ni protecziuns da lavinas. In grond tema vegn ils proxims onns era ad esser ils passa 100 tunnels. Uschia investescha la Viafier retica mintg’onn 34 milliuns en il mantegniment dals tunnels.

RR novitads 11:00