Siglir tar il cuntegn
Inhalt

Svizra Grond pievel al «Zibelemärit» a Berna

Tarscholas e tschupels da tschagulas: Il «Zibelemärit» carmala la glieud a Berna. Las temperaturas fraidas na disturban para betg ils visitaders.

La fascinaziun per la tschagula ha tschiffà Berna: Millis persunas visitan dapi la bun’ura il «Zibelemärit». Purs da legums offreschan tozzels tonnas tschagulas, ma er agl, carottas, por e ragischs nairas. E perquai ch’i sa tracta d’ina festa populara datti era numerus stans da marenda, bars en il liber e stans da sourvenir. Dapli che 100 cars da la Svizra e da l’exteriur portan ils mirveglius a Berna.

Simplamain dapertut èn ellas da chattar oz a Berna: las tschagulas.
Legenda: Simplamain dapertut èn ellas da chattar oz a Berna: las tschagulas. Keystone

Ils indigens cumenzan, ils auters suondan

La bun’ura dal «Zibeler» tutga tradiziunalmain als indigens che spassegian sur la Plazza federala u cumpran lur tarschola a la «front». Durant il di sa fultschan lura 10’000s persunas tras las streglias da la chapitala.

Ina tradiziun dal 19avel tschientaner

Il «Zibelemärit» ha mintgamai lieu il quart glindesdi dal november. La festa datescha dal 19avel tschientaner. Lura avevan puras da la regiun dal lai da Bienna e da Friburg cumenzà a vender lur verdura a Berna, numnadamain a partir dal di da s. Martin (11 da november) – quai durant duas emnas.