Siglir tar il cuntegn

Header

Navigaziun

272 milliuns francs ha il Grischun survegni dal 2017 per la gulivaziun da finanzas.
Legenda: 272 milliuns francs ha il Grischun survegni dal 2017 per la gulivaziun da finanzas. NFA Geberkantone
cuntegn

Svizra Grischun duai survegnir pli paucs raps

La gulivaziun da finanzas en Svizra duai vegnir optimada. Chantuns che pajan duain in avegnir profitar e chantuns che retiran duain survegnir pli pauc. Per il Grischun fissan quai tenor prognosa var 20 fin 30 milliuns pli pauc, conferma la ministra da finanzas Barbara Janom Steiner.

Igl è in cumpromiss che la conferenza da las regenzas chantunalas ha preschentà. Ils chantuns che pajan n'eran betg cuntents cun la situaziun: Els stoppian pajar memia bler. Ils chantuns che retiran raps èn però dependents da quels.

Per il mument è la situaziun quella, che 7 chantuns pajan en la cassa e 19 chantuns survegnan quels raps. Quest sistem haja sa cumprovà, stoppia dentant vegnir optimà, hai num davart dals chantuns.

Tar il cumpromiss sa tracti mo per il cumpart da la gulivaziun da las resursas.

I fa mal, nus vegnin ad avair damain raps, i vegn però ad esser supportabel.
Autur: Barbara Janom Steinerministra da finanzas GR

A la conferenza da chantuns han 21 chantuns vuschà per il cumpromiss. Tut ils chantuns donaturs eran per il cumpromiss. Cunter il cumpromiss eran 4 chantuns debels, 1 chantun è s'abstegnì da la vusch.

Legenda: Guardar il video Barbara Janom Steiner davar la gulivaziun da finanzas. Durada 00:59 minutas.
Or da RTR dals 17.03.2017.
Cun ils chantuns che pajan hai adina dà dapli dispitas l'ultim temp. Cun il cumpromiss che nus avain chattà essan nus da la vart segira. Pli gugent segirezza finanziala empè da dispita.
Autur: Barbara Janom Steinerministra da finanzas GR

Sco proxim pass duai il Cussegl federal elavurar in rapport pertutgant la gulivaziun da finanzas. Sche tut va tenor plan debattass lura il parlament il 2018 davart il midament, il 2020 duai la lescha ir en vigur.

Tar la gulivaziun da finanzas vegnan resguardads trais differents facturs:

  • Gulivaziun da resursas
    En la gulivaziun da resursas van ils pli blers raps. Per calcular quant che mintga chantun survegn per la gulivaziun da resursas vegn resguardada en prima lingia la taglia.
  • Cumpensaziun da l'inegualitad
    Qua vegnan resguardadas las premissas dals chantuns. Per exempel las premissas geograficas. Il chantun Grischun è in chantun muntagnard ed ha perquai autras premissas ch'ils chantuns da la bassa.
  • Gulivaziun da las grevezzas
    Chantuns che han pli pauc pervia da la gulivaziun da finanzas survegnan la gulivaziun da las grevezzas per ch'els pon s'adattar a la situaziun. Quest import e limità fin il 2036.

RR novitads 16:00

Optimar gulivaziun da finanzas

La proposta per megliurar la situaziun da finanzas è vegnida elavurada dad ina gruppa da lavur: da la cussegliera guvernativa dal Grischun Barbara Janom Steiner, il president da la conferenza dals chantuns Jean-Michel Cina, l’anteriur cusseglier guvernativ Franz Marty ed il respunsabel per las finanzas da Genevra Serge Dal Busco.