Grippa d'utschels - dus novs cas en Svizra

En Svizra datti puspè novs cas da la grippa d'utschels. Per la prima giada dapi l'entschatta schaner sajan dus utschels puspè crappads pervia dal virus H5N8, communitgescha l'Uffizi federal per la segirezza alimentara.

Dus cigns.

Legenda da maletgs: En Svizra è vegnì annunzià dus novs cas da grippa d'utschels: dus cigns èn pertutgads. Keystone

I sa tractia da cigns ch'ins haja chattà datiers Yverdon-les-Bains al lai da Neuchâtel. La Confederaziun è ussa vid il sclerir cun las autoritads chantunalas sch'i dat ulteriurs cas. Saja quai il cas vegnia decis davart mesiras da precauziun. Ils cas da infecziuns novas sajan sa reducids, tuttina na saja il privel betg bandegià, manegian ils experts.

Ulteriuras retschertgas

Ils davos mais èn vegnids annunziads plirs cas da grippa d'utschels da l'entira Europa, il davos da l'Italia. En Svizra è l'emprim cas enconuschent dapi ils 6 da schaner, quel dal chantun Genevra. Totalmain datti 121 cas ch'èn confermads e quai sin 376 animals analisads. I sa tracta oravant tut dad andas mora, muettas e cigns.

La Confederaziun appellescha però a la populaziun d'esser precauta e d'annunziar cas suspectus al veterinari.

RR novitads 18:00