Siglir tar il cuntegn

Svizra GPK crititgescha chantuns tar arrest da repatriament

Tar requirents d'asil che na vegnan betg acceptads è la probabilitad en tscherts chantuns pli auta da vegnir en arrest ch'en auters chantuns. Era haja quai dà singuls cas, nua che uffants sajan vegnids en praschun.

Legende: Audio Saira: Politica d'asil – GPK crititgescha arrest per uffants abspielen. Laufzeit 03:06 Minuten.
03:06 min, Actualitad dals 28.06.2018.

La cumissiun da gestiun dal cussegl naziunal crititgescha la situaziun da l'arrest da repatriament en Svizra. En divers chantuns vegnian persunas che tschertgan asil, e na survegnan quel betg, messas en arrest. En auters chantuns betg. Entant che la quota d'arrest tar cas da Dublin è en il chantun Vaad tar passa 10%, e quella en il Grischun tar passa 60%, declera Alfred Heer, il president da la cumissiun da gestiun. El pretenda dad armonisar las mesiras. En il Grischun vesan ins auter quai. Tenor Georg Carl, responsabel per dumondas d'asil en il chantun Grischun, èn ins simplamain consequent e fa quai che la lescha di.

Arrestar uffants saja illegal

Tenor la cumissiun da gestiun datti era cas, nua che uffants èn vegnids arrestads ensemen cun la famiglia. Quai cuntrafetschia a la convenziun dals dretgs d'uffants. Lezza scumonda da metter en praschun uffants sut 15 onns. En divers chantuns saja quai però stà il cas. Indicaziuns concretas manchian però, causa che ils chantuns n'han betg documentà correctamain ils cas.

En il Grischun na saja quai però betg capità, di il responsabel per dumondas d'asil Georg Carl.

RR novitads 16:00