Siglir tar il cuntegn
Inhalt

Svizra Glifosat en bunamain la mesadad da las mangiativas en Svizra

En Svizra cuntegnan bunamain 40% da las mangiativas fastizs dal dispitaivel med per disfar zerclim glifosat. Ils quantums dals fastizs èn dentant sut la limita da cunfin. Quai demussan emprims resultats d'ina retschertga da la Confederaziun.

In pur sprizza cun il tractor erbizids per disfar zerclim
Legenda: In pur sprizza cun il tractor erbizids per disfar zerclim (maletg d'archiv). Keystone

En intginas emnas duain quests resultats vegnir publitgads en in rapport. Sin la pagina d'internet da l'Uffizi federal per segirtad da mangiativas èn dentant gia publitgadas emprimas conclusiuns.

Entaifer la retschertga èn 230 provas da mangiativas vegnidas intercuridas sin fastizs da glifosat. Tranter auter per exempel mel d'avieuls, vin, paun, tartuffels e verduras.

Il pli pertutgads èn pastas, flocs d'ensolver e leguminosas

Las pli autas concentraziuns da glifosat èn vegnidas chattadas en pastas, flocs d'ensolver ed en leguminosas, dentant sajan ils quantums anc sut la limita da cunfin.

Nagin ristg per la sanadad

Plinavant na saja il monitoring anc betg finì. Però mussian ils resultats gia ussa ch'ils fastizs da glifosat na sajan betg privlus per la sanadad. Per illustrar quai fan ils auturs in exempel cun pastas: In creschì stuess mangiar passa 71kg pastas per di. Pir lura cuntanschess el la anc acceptabla dosa maximala da 30 miligramms glifosat.

RR novitads 14:00

Glifosat

Glifosat

Sin l'entir mund vegn duvrà il pli savens l'erbicid glifosat. Tenor stimaziun vegn duvrà en Svizra 300 tonnas glifosat ad onn. L'Organisaziun mundiala da la sanadad (WHO) ha ditg l'onn 2015 che glifosat «chaschuna probablamain cancer».