Siglir tar il cuntegn
cuntegn

Svizra Glatschers perdan massivamain volumen

Da l'october 2016 fin il settember 2017 han ils glatschers pers totalmain 1'500 milliuns meters cubic. Quai correspunda a 3% dal volumen da glatsch ed è tenor experts ina reducziun extrema.

Cuvertas protegian il glatscher dal Corvatsch avant il luar. (maletg dal avust 2011).
Legenda: Cuvertas protegian il glatscher dal Corvatsch dal luar. (maletg dal avust 2011). Keystone

Ils onns 2017, 2015 e 2003 han ils glatschers svizzers pers il pli bler glatsch dapi l'entschatta da las mesiraziuns da glatschers. Il 2017 è la reducziun stada anc pli massiva che durant la stad da chalur 2015, dentant pli pitschna che quella da l'onn 2003. Quai ha communitgà la cumissiun da l'Academia per scienzas natiralas.

Pauca naiv l'enviern passà e chalira durant la stad

Il december 2016 è stà in dals pli sitgs mais dapi l'entschatta da las mesiraziuns da glatschers. Ed era durant ils mais suenter ha i bischà pli pauc ch'en media. La chalira dal fanadur e dal avust ha lura anc pegiurà la situaziun. Damai che la cuverta da naiv è sa sminuida durant quest temp, èn ils glatschers luads anc pli svelt.

Consequenzas per tuttas regiuns

Ord l'evaluaziun resulta ch'il glatsch è luà surproporziunal en tuttas regiuns svizras. Perquai ch'ils glatschers lieuan cuntinuant dattan ensemen bleras lieungas da glatscher. Pertutgadas èn cunzunt las regiuns tranter la Part Sura Bernaisa dal vest ed il Vallais. Là è la cuverta da glatsch sa diminuida per dus fin trais meters – glatschers en las ulteriuras regiuns per in fin dus meters.

RR novitads 14:00