Siglir tar il cuntegn

Svizra Giura sco exempel per la Catalugna

A Berna ha il cusseglier federal Ignazio Cassis beneventà ses collega d'uffizi spagnol, il minister da l'exteriur Alfonso Dastis.

Cusseglier federal Ignazio Cassis beneventa il minister da l'exteriur da la Spagna, Alfonso Dastis.
Legenda: CF Ignazio Cassis (dretg) ha beneventà il minister da l'exteriur da la Spagna, Alfonso Dastis, a Berna. Keystone

Temas da l'inscunter eran tranter auter las relaziuns bilateralas, la situaziun en Siria ed il conflict d'autonomia da la Catalugna.

L'entira Spagna duai decider

En quai connex ha Dastis ditg, ch’il process che haja manà en Svizra a la fundaziun dal chantun Giura ils onns 70 e qua tras a l’independenza d’ina gronda part da las vischnancas francofonas dal chantun Berna, possia esser in exempel per ina schliaziun paschaivla dal conflict tranter la regenza statala a Madrid ed il moviment d’independenza en la Catalugna. El ha dentant era accentuà, che sulettamain ina consultaziun e votaziun en l’entira Spagna possia dar glisch verda per l’independenza da la provinza el vest da la Spagna.

Il schefdiplomat spagnol ha era prendì posiziun quai che pertutga il futur da duas separatistas catalanas che sa chattan il mument en Svizra. Tenor Alfonso Dastis na datti nagina raschun che la Svizra concedi a las duas dunnas asil politic. La Spagna saja in stadi da dretg, ha el ditg avant las medias a Berna.

RR actualitad 17:00