Siglir tar il cuntegn

Header

tram en la citad da Turitg
Legenda: Il «liun» da Turitg na mussa fin uss betg gronda fom per gieus olimpics. Keystone
cuntegn

Svizra Gieus olimpics: Turitg resta sin sia posiziun

La regenza da la citad ha dà resposta sin l'interpellaziun urgenta dal deputà Marco Denoth da la PS. Ella na mida betg sia posiziun ed è da l'avis che Swiss Olympic e la Confederaziun stuessen surpigliar la direcziun d'ina candidatura svizra.

Da pincip haja il cussegl da la citad da Turitg ina tenuta positiva envers gieus olimpics. Cunquai ch'ina candidatura svizra stuess sa far valair avant il Comité olimpic internaziunal e cunter autras candidaturas, saja quai in'incumbensa da muntada naziunala. Uschia scriva la regenza turitgaisa en sia resposta.

Il cussegl da la citad haja manà trais discurs cun ils exponents da la candidatura «Grischun e partenaris 2026». Er sche questa candidatura survegniss l'incumbensa da Swiss Olympic

  • na construess Turitg nagins novs implants da sport u autra infrastructura
  • na stat Turitg betg a disposiziun sco Host City
  • na surpiglia Turitg naginas garanzias grondas u nunlimitadas e
  • na fa Turitg betg part dal comité d'organisaziun.

Il cussegl da la citad fiss però pront da discutar davart in'integraziun da Turitg en la candidatura grischuna (sche quella vegniss sustegnida da Swiss Olympic), respunda la regenza. Ella fiss era pronta d'examinar en il rom da sias cumpetenzas in sustegn finanzial.

La regenza da Turitg po decider persula fin ina summa da 2 milliuns francs. Dapli dovra il consentiment dal parlament da la citad. Lez tracta l'interpellaziun da Denoth en sia seduta da mesemna proxima (18-01-2017).

RR novitads 06:00