A Sion, sin la planira da Magadino, ma er en las valladas dal Tessin hai dà l'avrigl 2018 gia 9 dis da temperaturas sur 25 grads. En in avrigl mediocher cuntanschan las temperaturas mo durant in di uschè chaudas temperaturas. Dentant er en la Bassa Centrala ha la stad gia chattà la via. Ad Aarau hai gia dà tschintg dis da stad, a Turitg quatter.
En general bler memia chaud
En l'entir pajais èsi stà bler memia chaud. En il nord è la temperatura stada radund 5 grads sur la norma dals onns 1961 enfin 1990, en il sid èsi stà radund 3,5 grads pli chaud. Cun quai giascha l'avrigl 2018 sin plazza dus, sulettamain pli chaud è stà l'avrigl 2007. En la Svizra dal nordost è l'avrigl per part perfin stà il pli chaud dapi il cumenzament da las mesiraziuns.
Spezialmain chaud èsi stà tranter ils 20 ed ils 22 d'avrigl. A Sion hai dà 28,9 grads, la pli auta temperatura mesirada insumma durant l'avrigl. Era novas temperaturas maximalas hai dà ad Engelberg ed en divers lieus en il Giura. L'avrigl hai dentant era dà fasas in zic pli frestgas. Ils 2 d'avrigl hai dà a l'eroport da Turitg -3,2 grads.
Sulegl ha puspè gust
Suenter ils mais plitost grischs dal favrer e mars è l'avrigl stà fitg sulegliv. A Lucerna hai dà 70% dapli uras da sulegl che uschiglio durant l'avrigl. En general è il sulegl sa mussà 40-50% dapli en il nord da las alps. Er en il sid da la Svizra èsi stà pli sulegliv. Là dentant be 10-20% dapli che uschiglio. Vesi absolut è il nord da la Svizra stà il pli sulegliv.
L'autra vart da la medaglia
En il nord da las alps è l'avrigl stà bler memia sitg. Sur tut en il chantun Turitg hai dà dapi l'entschatta dal mais en blers lieus be 5 fin 10 millimeters plievgia. En general èsi era stà memia sitg en la Svizra Centrala. I ha dà la radund 10 fin 30% da la plievgia ch'è usitada durant l'avrigl. La sitgira ha per part manà tar incendis ed era allergichers han stuì patir. Impressiunant èn era stads ils stemprads da pollen dals ultims dis. En il sid da las alps è l'avrigl dentant stà per part memia bletsch.
Mais da deletg vegn pir anc
Il mais da matg vala sco mais da deletg. Anc n'èsi betg cler co i va vinavant. A la natira faschess ina fasa pli lunga da plievgia bain. Anc n'è dentant betg cler sche las frontas da l'Atlantic pon sa metter tras enfin tar nus.
RR novitads 12:00
