Siglir tar il cuntegn

Header

cuntegn

Svizra Gerhard Pfister è il sulet candidat per successiun da Darbellay

Uss èsi uffizial: Il cusseglier naziunal da Zug Gerhard Pister è il sulet candidat per la successiun dal president da la PCD Christophe Darbellay. Persunas interessadas han pudì s’annunziar fin dumengia saira tar la cumissiun responsabla.

Il cusseglier naziunal da Zug Gerhard Pfister è l'unic candidat per la successiun dal president da la PCD, Christophe Darbellay. Quai communitgescha la cumissiun responsabla da la Partida cristiandemocratica.

Nagina surpraisa

La schelta da be in candidat n’è però nagina gronda surpraisa. Auters candidats pussaivels sco per exempel il cusseglier dals chantuns dal Soloturn Pirmin Bischof u il cusseglier naziunal grischun Martin Candinas avevan gia desistì d’ina candidatura las emnas passadas.

Sulet in politicher aveva pensà publicamain vi d’ina candidatura, numnadamain Reto Nause da Berna. La finala ha el prendì la decisiun cunter la candidatura per il presidi da la Partida cristiandemocratica.

Candidatura da Pfister na plascha betg a tuts

Gerhard Pfister ha 53 onns ed è dapi il 2003 commember dal Cussegl naziunal. El appartegn a l’ala dretga da la PCD, quai che na gusta betg a tuts commembers.

Dacurt aveva il cusseglier naziunal dal Valais Yannis Buttet annunzià sia candidatura sco vicepresident da la PCD. El vesa sasez explicitamain sco cuntrapais da Pfister. Dasper Buttet candidescha er la cussegliera naziunala Ida Glanzmann (LU) per il vicepresidi.

Il nov president vegn elegì ils 23 d'avrigl a la radunanza da delegads a Winterthur.

RR novitads 11:00

Artitgels legids il pli savens