Da las bunamain 5'000 persunas en Svizra che han prendì part a la retschertga èn var 42% da l'avis ch'i dettia memia blera glieud veglia. Ils mainis sa repartan lura tenor la vegliadetgna: Ils giuvenils sut 20 onns din plitost «Gea». Pli vegls ch’ils dumandads èn e pli tgunsch ch'els din «Na». En la categoria 34 e pli vegl è quai 70%.
Adina dapli glieud veglia
La quota da la persunas veglias crescha cuntinuadamain. Oz stattan sper 100 persunas tranter 20 e 64 onns 29 persunas da 65 onns e pli vegl. L’entschatta dal 20avel tschientaner eran quai be 11 persunas.
E tgi duai en futur lura pajar l'AVS?
Dapi bun 70 onns datti ella, la Assicuranza per vegls e survivents (AVS). Dapi lura ha mintga Svizra e mintga Svizzer il dretg sin ina renta che duai curclar ils basegns existenzials. Dentant è la finanziaziun per il futur betg segirada ozendi.
L’iniziativa AVSplus - che vegn ils 25 da settember avant l’urna - pretenda 10% dapli rentas per tuts. Pia stuessan tut ils lavurants pajar dapli renta. Ma èn ils giuvens era pronts da pajar quels 10% dapli per segirar l'AVS u betg?
Adatg: Las datas numnadas en quest artitgel sa midan cuntinuadamain.
9 pajais vesan quai in zichel auter
La Spagna, il Portugal, l'Italia e la Grezia din gea sin la dumonda «Avain nus memia blera glieud veglia». Menziunar pudess ins qua la Grezia. Da bunamain 6’000 persunas din 75% «Gea» E quai è cun distanza il pajais cun ils resultats ils pli auts.
Dentant era ils pajais da l’ost sco la Slovenia, la Slovachia, la Rumenia, la Bulgaria e l’Estonia èn da quest avis. Qua ston ins dentant far attenziun. Enfin uss n’han betg bleras persunas fatg part a la retschertga. En quests pajais han en media be 100 persunas respundì sin questa dumonda.
E ti? Tge pensas ti? Avain nus memia blera glieud veglia? Ta participescha er ti al questiunari online «Generation What?». Il questiunari è avert fin l'avrigl 2017.