En Svizra na datti nagina discussiun: 71% da la giuventetgna na vul betg desister dal dretg d'eleger. 29% pudessan viver era senza. Nagina discussiun, perquai che questa relaziun da radund 7:3 sa tira tras tut las gruppas da las passa 5'100 persunas svizras tranter 16 e 34 ch'han respundì fin ussa il questiunari da l'acziun «Generation What?».
Avair il dretg na munta para betg automatic exequir el
Giuven u giuvna, en studi u en vita da lavur, en tut las vegliadetgnas tranter 16 e 34 onns. Radund 70% vulan pudair decider tgi che regia il stadi. Quai cuntradescha però cun la participaziun concreta tar elecziuns. Per exempel tar las elecziuns parlamentaras dal 2011 era la participaziun da persunas tranter 18 e 34 tar intragliauter 32.5%.
Sche questa differenza è reala ubain perquai ch'i n'è betg represchentativ n'è betg cler. Midar quai pon giuvens e giuvnas cun participar al questiunari.
Dapli differenzas tar las cifras per l'entira Europa
Las cifras per l'entira Europa èn bain pli miaivlas, però anc adina cleras cun 63% che vulan cundecider tar elecziuns, e 37% ch'i n'emporta betg. Qua sa basa il questiunari sin bunamain 600'000 persunas tranter 16 e 34 onns ch'han respundì.
I dat però differenzas: Giuvens e giuvnas da l'Italia e da la Frantscha han ina pli gronda part che pudess era viver senza eleger. 47% dals Talians e 45% dals Franzos na pendan betg vi dal dretg d'eleger.