Siglir tar il cuntegn

Svizra Gea per la lescha davart il servetsch d'infurmaziun en Grischun

Las directuras ed ils directurs da giustia e polizia dals chantuns da la Svizra orientala sustegnan il project per la lescha davart il servetsch secret. Tenor els vegn adattà l'activitad, l'instrucziun e la controlla dal servetsch d'infurmaziun federal.

Antennas sin in bot dad in cuolm
Legenda: La lescha davart il servetsch d'infurmaziun dat dapli pussaivladads ad el. Keystone

La lescha davart il servetsch d'infurmaziun empermettia da proteger meglier la Svizra en spezial cunter l'extremissem violent, cunter il terrorissem, cunter la spiunascha economica e cunter attatgas virtualas. Uschia fan a savair ils directurs e las directuras da giustia. Tras l'extremissem violent ed il terrorissem vegnia periclitada er la segirezza en Svizra. Cun la nova lescha davart il servetsch secret duai la segirezza vegnir augmentada.

Ina decisiun unanima

La conferenza da las directuras e dals directurs chantunals, che cumpiglia ils chantuns Appenzell Dador, Appenzell Dadens, Glaruna, Grischun, Schaffusa, Son Gagl, Turgovia e Turitg, sustegna unanimamain il project per la lescha davart il servetsch d'infurmaziun. La lescha davart il servetsch d'infurmaziun dat al servetsch d'infurmaziun da la confederaziun dapli pussaivladads. Ella rinforza però er la controlla independenta da sias activitads. La lescha davart il servetsch d'infurmaziun serva directamain a la segirezza da la Svizra.

Ils 25 da settember vegn decidì sur da la lescha davart il servetsch d'infurmaziun.

RR novitads 11:00