Suletta mesira concreta è l'obligaziun d'annunziar plazzas avertas als centers per intermediaziun da lavur. Il Cussegl naziunal ha perencunter refusà mesiras unilateralas che violeschan la cunvegna da la libra circulaziun. - En la sessiun d'enviern s'occupa lura il Cussegl dals chantuns cun la fatschenta.
Debatta d'entrada emoziunala e viva
Per la Partida populara e per Adrian Amstutz èsi gia al cumenzament da la debatta d'entrada cler che l’iniziativa na vegnia betg realisada en il senn da la PPS. Uschia ha Amstutz ditg che la proposta da la cumissiun d’instituziuns politicas saja cunter la constituziun. La veglia dal pievel na vegnia betg resguardada e la democrazia privata purtada a fossa, ha ditg Amstutz en il Cussegl naziunal. La PPS ha vilentà durant la debatta d'entrada cun prolungar il temp da discurrer dad Adrian Amstutz. Ils commembers da la fracziun da la PPS han fatg diever da lur dretg da pudair tschentar dumondas a la persuna che ha discurrì. Uschia han plirs commembers da la PPS tschentà dumondas a lur schef da fracziun.
Ulteriuras fracziuns vulan ina soluziun
La realisaziun da l’iniziativa d’immigraziun da massa na saja gnanc pussaivla senza cumpromiss. Ina realisaziun pled per pled na saja betg pussaivla, ha ditg Christa Markwalder da la PLD. Uss saja impurtant da chattar la meglra varianta per chattar ina soluziun cun l’Uniun europeica, argumentescha la PLD. Era la partida socialdemocratica na vul cunzunt betg periclitar las contractivas bilateralas cun l’UE.
Favurisaziun d’indigens
Per il pledader da la cumissiun Kurt Fluri (PLD) n’èra quai betg simpel da concretisar l’iniziativa. Cunzunt saja ella per part cuntradictorica ed era concretas indicaziuns sco la grondezza da contingents manca. Uschia era quai cler per la cumissiun che la cunvegna da libra circulaziun da persunas na dastga betg vegnir messa en dumonda, ha ditg Fluri. Cun la soluziun da la favurisaziun d’indigens «light» saja giud maisa il squitsch da l’UE da cumbinar la dumonda d’immigraziun cun las contractivas davart las cunvegnas da basa. Ma betg sulet la PPS ha dubis che cun questa favurisaziun d’indigens light na vegnia la lescha realisada tenor la veglia dal pievel. Uschia ha er la PCD pretendì mesiras pli severas. Questas mesiras n'han dentant betg chattà ina maioritad.
Magdalena Martullo è trumpada che la PLD coopereschia ussa cun la sanestra en questa chaussa. Ella na chapescha betg ch'ina iniziativa dal pievel vegnia simplamain betg messa enturn. Tschellas partidas vesan quai tut auter. Duri Campell di ch'i haja gia da autras iniziativas che na sajan betg vegnidas messas enturn sco il pievel haja vulì. Quai saja ina dumonda da tge ch'ins valiteschia pli aut. U ils texts en la constituziun ni ils contracts bilaterals. El saja dal maini ch'ils contracts bilaterals hajan dapli paisa. Il Cussegl dals chantuns sto dentant era anc ir sur la lescha ora e forsa dettia là era anc midadas.
RR novitads 21:00