Siglir tar il cuntegn
Inhalt

Svizra Gea al servetsch d'infurmaziun e na a pli autas rentas

Quai èn las parolas da la Partida populara svizra en vista a las votaziuns dals 25 da settember. Plinavant ha ils delegads da la PPS demussà ch'els veglian bain collavurar, ma betg «maridar» l'Uniun europeica.

Albert Rösti:Il president da la PPS tar ses pled d'avertura a la radunanza da delegads a Wettingen.
Legenda: Albert Rösti: Il president da la PPS tar ses pled d'avertura a la radunanza da delegads a Wettingen. Keystone

Conservar las valurs svizras e praticar ina politica d'asil consequenta: Quai è tenor il president da la PPS, Albert Rösti, la via da success per la Svizra en l'avegnir. Sin il terror en il mund saja da reagir cun fermezza en favur da la cultura e las valurs da la Svizra, ha Rösti ditg. Tgi che veglia vegnir en Svizra stoppia s'adattar.

En ses pled d'avertura ha Rösti plinavant crititgà il nov text da l'imni naziunal: Gist en quest temp cura ch'il Stadi Islamic classifitgeschia tut ils auters sco nuncartents duaja l'imni vegnir chantà senza ils pleds 'Dieu il Tutpussant'. Quai saja in fraud a las valurs svizras.

Ils delegads da la PPS èn sa radunads la sonda a Wettingen. La Svizra e l'Uniun europeica èn stads en il center da las discussiuns.

Cunvegna cun l'UE n'è betg bainvesida tar ils delegads

La Svizra drovia ina cunvegna cun l'Uniun europeica per garantir vinavant l'access sin il matgà europeic. Quai ha ditg il secretari da stadi Jaques de Wattville davant ils delegads da la PPS a Wettingen.

La Svizra duaja cooperar cun l'UE, ma perquai na stoppia ella betg «maridar» ella. Uschia ha argumentà il cusseglier naziunal Roger Köppel. Las reacziuns dals delegads mussan dentant cleramain ch'ina cunvegna en il senn da Wattville n'avess nagina schanza tar la Partida populara svizra.

Maurer ha ludà la collavuraziun cun l'Italia

En ses pled ha Cusseglier federal Ueli Maurer discurrì da la situaziun da fugitivs al cunfin en il sid da la Svizra e ludà en quest connex la collavuraziun cun l'Italia. Actualmain saja quai pussaivel da puspè surdar passa 1'000 fugitivs a l'Italia. L'Italia portia questa glieud davent dal cunfin.

Maurer ha er suttastritgà la buna collavuraziun cun las guardias da cunfin svizras. Tgi che veglia mo traversar la Svizra ubain n'haja nagins documents vegnia tramess enavos, uschia Maurer.

Gea a per il servetsch d'infurmaziun e na a pli autas rentas

En vista a las votaziuns dals 25 da settember ha la PPS decis in gea per la lescha davart il servetsch d'infurmaziun. In na han ils delegads decis per l'iniziativa per las pli autas rentas da la AVS.

RR novitads 12:00++