Il Cussegl dals chantuns ha approvà cun gronda maioritad la basa legala per il barat d'infurmaziuns automatic. El suonda uschia al Cussegl naziunal ch'aveva gia ditg gea pli baud en chaussa. Dentant nagina schanza ha gì l'amnestia fiscala ch'il Cussegl naziunal aveva integrà en la lescha per animar persunas ch’han defraudà da declerar lur daners nairs. Il Cussegl dals chantuns è stà da l'avis ch'ina tala amnestia sutmineschia la morala fiscala ed affruntia tut ils pajataglias undraivels.
La fatschenta va uss enavos en il Cussegl naziunal per eliminar pitschnas differenzas. Ozendi furnescha la Svizra mo sin dumonda infurmaziuns davart defraudaders da taglia ad auters pajais. En l'avegnir vegnan las autoritads svizras activas da sasez. Cunvegnas correspundentas ha la Svizra suttascrit fin uss cun l'Uniun europeica e l'Australia.
RR novitads 12:00