Siglir tar il cuntegn

Header

cuntegn

Svizra Garanzia da cumpra duai gidar ovras idraulicas

Persunas privatas ed interpresas pitschnas e mesaunas duain en il futur mo pli retrair electricitad d'ovras idraulicas. Cun quella mesira spera la UREK-N da pudair sustegnair las ovras idraulicas che produceschan oz circa 60 pertschient da l'electricitad en Svizra.

Christian Imark (pps/SO)
Legenda: Christian Imark (pps/SO) Keystone

Ils possessurs d'ovras idraulicas planschan dapi intgins onns che quellas na rendian betg pli, ils pretschs sin la fiera d'electricitad sajan memia bass. Cun ina garanzia da cumpra sco quai che la cumissiun ha preschentà fiss quai puspè auter.

Betg ponderà ed in sfurzim

Il Cusseglier naziunal Christian Imark (PPS/SO) na po betg sa stgaudar per quella proposta. Per el è la fatschenta mal preparada e simplamain in sfurzim. «Nus n’avain betg analisà la situaziun e na savain perquai era betg, tge problem che nus duain schliar.» La proposta saja perquai in’acziun malponderada. Plinavant na vegnian betg tuts tractads tuttina. Quels che dovrian blera electricitad sappian retrair lur electricitad nua ch'els veglian. Star botta stoppian ils pitschens. E quai saja malgist. Ils consuments che dovrian damain che 100’000 uras kilowatt n’hajan nagin access a la fiera d’electricitad libra e stoppian perquai pajar pretschs pli auts per lur electricitad. La proposta augmentass ussa anc ils custs d’electricitad per quels.

Favuraivel e popular

Sustegn per la proposta datti perencunter da la Cussegliera naziunala Silva Semadeni (PS/GR). Las ovras idraulicas furmian la basa dal provediment electric en Svizra. Quella vali da mantegnair. Ultra da quai na custi l'electricitad idraulica betg ton sco quai ch'ins manegi. Ella custia pli pauc che l’energia atomara, solara e da vent. Perquai saja ella ideala per il provediment da basa. Ultra da quai na sappian ins era betg discutar da malgistadad. La pli gronda part dals consuments retiria numnadamain gia oz electricitad schubra dad ovras idraulicas. «90 pertschient dals abitants da Cuira retira energia idraulica. E quels che na fan betg quai ston pajar in zic dapli.»

Silva Semadeni dal PS GR
Legenda: Silva Semadeni (ps/GR) Keystone

Tuttina giaja la proposta en la fallida direcziun, recloma Imark. Ins stoppia empruvar da sbassar ils custs da l’electricitad e lura possian ins era francar il rom per la segirtad dal provediment d’electricitad e la cumpatibilitad ecologica.

Quai vul era Semadeni. La proposta per il provediment da basa mo cun electricitad idraulica maini sin quella via. Sche l’energia idraulica haja in pretsch garantì, sch’ins paja quai ch’ella custia, lura hajan ins ina meglra posiziun per defender ils tschains d’aua sin il livel actual. Tschains d'aua che vegnian attatgads da gist quels che sajan ussa cunter il provediment da basa cun electricitad idraulica, di Semadeni.

RR actualitad 17:00

Artitgels legids il pli savens