Siglir tar il cuntegn
Inhalt

Svizra Galenica entra en il martgà dal tractament da plajas

Las marcas da tradiziun svizras Merfen e Vita-Merfen vegnan en novs mauns. La gruppa Galenica surpiglia las marcas da l'interpresa GSK Consumer Healthcare Svizra. Galenica ponderescha er da reintroducir la pomada u l'itg da Vita-Merfen ch'è vegnida prendida ord il sortiment il 2014.

logo da Galenica
Legenda: Galenica sa cumpra en il martgà dal tractament da plajas. Keystone

Vifor Consumer Health, ina figlia da la fatschenta d'apoteca e logistica Galenica Santé, surpiglia ils dretg da commerzialisar Merfen e Vita Merfen sco er ils dretg e la concessiun en la Svizra. Uschia communitgescha la gruppa Galenica.

Il martgà dal tractament e la desinfecziun da plajas haja ina cumpart da passa 50 milliuns francs scriva l'interpresa da farmazia svizra. Il dischinfectant Merfen saja fitg enconuschent ed haja cun ina cumpart dal martgà da 40% ina ferma posiziun.

La distribuziun da la pomada (l'itg) da Vita-Merfen è vegnida sistida avant trais onns. Sco motiv ha la producenta Novartis inditgà ch'ella n'haja betg chattà ina schliaziun cun ils furniturs per pudair garantir ils standards da qualitad. La pomada haja laschà ina largia tant tar las apotecas sco er tar ils consuments, scriva Galenica. Perquai veglian els examinar da reintroducir la pomada.

RR novitads 9:00