Siglir tar il cuntegn

Header

Navigaziun

Franz Ruppen da la PPS è da nov president da Naters en il Vallais.
Legenda: Franz Ruppen da la PPS è da nov president da Naters en il Vallais. Keystone
cuntegn

Svizra Franz Ruppen daventa president da Naters

Per l'emprima giada maina in commember da la Partida populara svizra ina citad vallesana. Franz Ruppen da la PPS è vegnì elegì cun 2'789 vuschs. Ses cuntracandidat, Philipp Mathias Bregy da la PCD è vegnì sin 1'903 vuschs.

L'elecziun da Ruppen n'è betg propi ina surpraisa. Gia tar las elecziuns per la suprastanza, ils 16 d'october aveva el fatg il meglier resultat. Lura aveva la PPS gudagnà in terz sez en l'executiva da set persunas da la vischnanca da Naters, e quai, sin ils custs da la PCD.

Figlia da Couchepin vegn presidenta a Martigny

Il suveran da Martigny ha elegì Anne-Laure Couchepin Vouilloz sco presidenta da la citad. La figlia da l'anteriur cusseglier federal Pascal Couchepin è l'emprima dunna che maina ina citad en la part franzosa dal Vallais.

Dunnas han success

Er en il Vallais Sut ha ina dunna gì success. La Cussegliera naziunala da la PCD, Géraldine Marchand-Balet ha gudagnà l'elecziun sco presidenta da la vischnanca Grimisuat.
Zermatt vegn medemamain manà en l'avegnir dad ina dunna. Romy Biner - Hauser da la PCD ha fatg la cursa per il presidi.
A Martigny-Combe è Florence Carron Darbellay da la PCD vegnida elegida sco presidenta da vischnanca. Ella è la dunna da l'anteriur president da la PCD Svizra, Christophe Darbellay.
In eclat ha i dà a Savièse, datiers da Sion. Là remplazza ina candidata da la PCD, Sylvain Dumoulin il president da vischnanca Michel Dubuis. Ella ha uschia pudì separar l'allianza «Entente» che regia gia dapi 80 onns en la vischnanca.

Sierre cun segund scrutini

Tgi che maina en il futur la vischnanca da Sierre n'è anc betg sclerì. Nagin dals trais candidats ha cuntanschì l'absolut pli. La successiun da François Genoud da la PLD vegn pia decidida en in segund scrutini.

RR novitads 18:00