Franc anc adina cleramain survalità

Il franc è tenor la Banca naziunala svizra anc adina cleramain survalità. Avant mintga decisiun da la politica monetara paisia la banca giu ils effects dal tschains negativ sin ils spargnaders.

Fritz Zurbrügg tar in pled al pult

Legenda da maletgs: Tenor il vicepresident n'ha la Banca naziunala svizra nagina finamira fixa per in curs dal franc. Keystone

Tenor il vicepresident da la Banca naziunala svizra, Fritz Zurbrügg, examinescha la banca mintga midada da la politica monetara cun las consequenzas per ils spargnaders. Quai ha Zurbrügg sincerà vers gasettas svizras.

In'ulteriura sbassada dals tschains restia però pussaivla. Per ils spargnaders saja quai il pli impurtant che l'economia creschia grazia a tschains negativs. Cun tschains pli auts fissan las consequenzas per la fiera da lavur mendras.

Il tschains negativ (actualmain tar 0,75%) saja gia ina mesira ferma. Cunquai ch'igl è però in instrument nov per la Banca naziunala, n'hajan ins naginas experientschas, tgeninas consequenzas concretas e directas ch'i saja da spetgar sin la fiera da lavur e la bursa, uschia Zurbrügg.

RR novitads 10:00