Las premias da cassas da malsauns creschan ad in crescher. Il cusseglier federal Alain Berset ha perquai incumbensà ina gruppa da lavur internaziunala che duai preschentar propostas, co ils custs dal sectur da sanadad pudessan vegnir franads e qua en emprima lingia ils custs per las premias da las cassas da malsauns. Uss ha Berset preschentà ils resultats.
38 mesiras per franar ils custs
La gruppa da lavur crititgescha en emprima lingia ch’ils acturs na s’occupian betg dal creschament dals custs. Surtut hajan quels avunda spazi da preschentar era models da provediment medicinals innovativs che spargnian custs e purtassan dapli effizienza, uschia Berset. En tut èn vegnids proponidas 38 mesiras. Tranter auter in limit maximal liant per franar il creschament dals custs che na dastga betg vegnir surpassà. Era propona la gruppa da lavur in artitgel d’innovaziun. Quai per pudair testar models innovativs. Era duain las purschidas ambulantas vegnir rinforzadas e tractaments betg nizzaivels duain vegnir evitads cun far els pli chars. Ultra da quai duai la cumpetenza medicinala dals pazients vegnir rinforzada per exempel cun promover da tschertgar segundas opiniuns. L’obligaziun da contracts metta la gruppa da lavur dal tuttafatg en dumonda.
Pliras mesiras gia instradadas
Tenor Alain Berset saja uss da far tant pli spert vinavant surtut tar las prestaziuns betg necessarias. Quellas na portian nagin avantatg per il pazient e chaschunian sulet custs. Era saja la transparenza tar ils custs da sanadad manglusa, quai stoppia sa midar, uschia Berset. Gia bun in terz da las mesiras proponidas sajan en planisaziun ni realisadas. Las ulteriuras mesiras vul il Departament dal intern realisar uschè svelt sco pussibel.
RR novitads 14:00