La fracziun da la PPS pretenda ina sessiun extraordinaria davart il fond d'urgenza statal per il concern d'energia l'Axpo. La delegaziun da finanzas dal parlament aveva dà liber il glindesdi ina dumonda dal Cussegl federal per in credit urgent da 4 milliardas francs.
Venderdi han ussa 55 cusseglieras naziunalas e cussegliers naziunals da la PPS inoltrà ina dumonda per ina sessiun extraordinaria. Ils servetschs dal parlament han confermà ina annunzia correspundenta dal schef fracziun da la PPS Thomas Aeschi sin Twitter. Il biro dal Cussegl naziunal sto anc approvar la debatta extraordinaria en il rom da la sessiun da settember. Cun ina decisiun saja da quintar gliendisdi. Cun suttascripziun da passa in quart dal cussegl naziunal ha la PPS accumplì las cundiziuns formalas per ina sessiun extraordinaria.
Tut las autras partidas avevan sustegnì il fond d'urgenza per l'Axpo. L'Allianza dal Center e la PLD avevan ludà las reglas strictas per il credit. La PS ed ils Verds avevan pretendì ina restructuraziun dal martgà d'electricitad.
