Siglir tar il cuntegn
Inhalt

Svizra Flums: Giuven era vegnì examinà pervi da fantasias da violenza

A Flums ha in Letton (17) attatgà dumengia saira pliras persunas cun ina sigir e blessà set dad ellas. Quant grevas che las blessuras èn, n'è betg vegnì enconuschent. Il Letton saja gia vegnì examinà da las autoritads pervi da fantasias da violenza è vegnì infurmà il glindesdi avantmezdi.

Krüsi ed ina mantunada da microfons.
Legenda: Hanspeter Krüsi, il pledader da la polizia da Son Gagl, tar l'infurmaziun a las medias. Keystone

Sco quai ch'il directur general da l'acziun Sigi Rüegg ha infurmà il glindesdi avant mezdi, haja il giuvenil ferì tar sias attatgas en quatter differents lieus a Flums set persunas. Ina dad ellas è vegnida ferida grevamain. In uffant pitschen saja crudà tar l'attatga or da la charrotscha.

Tenor emprimas infurmaziuns haja il giuven da sa responsar probablamain pervi da mazzament intenziunà in plirs cas, scriva l'agentura da novitads svizra SDA.

Il giuven emprendist era gia vegnì examinà pervi da fantasias da violenza

Tenor il procuratur per giuvenils responsabel dal chantun Son Gagl sa tracti tar l'attatgader dad in emprendist da 17 onns che na saja avant anc betg sa rendì chastiabel. Il giuven e sia famiglia sajan dentant vegnids accumpagnads fitg stretgamain.

Shop da tancadi a Flums.
Legenda: Il shop da tancadi a Flums, nua ch'il giuven ha attatgà ulteriuras persunas. Keystone

L'emprendist era crudà si gia il zercladur da quest onn pervi da ses depurtament. Il settember aveva el fatg emprimas allusiuns sin violenza. Perquai saja vegnì giuditgà ses potenzial da violenza. Cun quai ch'el na fascheva dentant naginas smanatschas concretas, n'eran betg vegnidas ordinadas mesiras repressivas.

Attatgà cun ina sigir in quatter lieus differents da Flums

Dumengia saira curt suenter las 20:00 aveva il giuven attatgà persunas en il center da Flums. Cur ch'el aveva vulì fugir cun in auto engulà ha el fatg in accident, dentant betg finì sia seria dad attatgas. Suenter ch'el aveva attatgà puspè persunas en ina butia d'in tancadi ha la polizia sajettà sin el ed arrestà el.

Tar questa acziun è il probabel attentader era vegnì blessà.

RR novitads 06:00