Siglir tar il cuntegn

Header

cuntegn

Svizra Firmas pitschnas en Svizra quintan cun damain occupaziun

La gronda maioritad dals patruns da lavur en Svizra quinta er proxim quartal cun in’occupaziun constanta. Per malsegirtad procuran dentant la realisaziun da l'iniziativa d'immigraziun da massa e la refurma da taglia sin interpresas. Cunzunt ils interprendiders pitschens èn pli pessimistics.

Quest resultat resorta dal barometer dal martgà da lavur che l'intermediatur da lavur Manpower ha publitgà oz.

750 responsabels da persunal svizzers èn vegnids dumandads. 91% da quels na spetgan nagina midada da lur dumber da persunal en l’emprim quartal dal 2017. Dals ulteriurs 9 fin 10% quintan per l’emprima giada dapi dus onns daplirs cun relaschadas che cun in augment dal persunal.

Gastronomia quinta cun dapli plazzas

Tut tenor branscha e regiun po quai dar grondas differenzas. Las perspectivas per l’industria da minieras, il servetsch public ed il sectur social sco er per l’industria elavuranta guardan or mender che fin qua. Cunzunt interpresas da la Bassa sco er da la Svizra Centrala e dal Nord èn s’exprimidas pli pessimistic.

Auter sa preschenta la situaziun en la gastronomia: Qua vegn prognostitgà in svilup positiv. La gastronomia quinta cun dapli occupaziun il proxim quartal. Plinavant quintan er ils secturs da bancas, assicuranzas, immobiglias e da servetsch cun meglras cundiziuns d’occupaziun. De facto è questa dentant be sa meglierada a Turitg.

RR novitads 07:30

Artitgels legids il pli savens